Oté

Bin la koué la ? In métod pou avans pti pa pti pa dann shomin Granboi !

Justin / 5 zanvié 2015

Zour d’l’an i sort pasé. Nou la fine déza ariv lo sink zanvyé. Domin i tir lo roi par l’fète ! lé ankor l’èr pou nou fé nout vé par nou mèm pou l’ané 2015. Kosa ni sava fé dann l’ané 2015 ? Ni sar fé inn-dé pa an avan, sansa ni sar kil aryèr ? Sa in gran késtyon sa pou nou, pou nout péi, pou nout pèp, sa in gran késtyon pou nout l’avnir.

Zot i koné na in n’afèr i pass son tan pou tourn dann mon tèt. Moin lé toultan a domandé pou kosa nout péi i vien pa bou alé an avan konmsa, mèm si na kart dann son min pars na kart dann son min. Mèm si kom di lo kont nana demoun an kapasité shé nou, mèm si nout tèr sé in bon tèr, nout mèr in bon mèr, nout klima lé bon galman, mèm konm di lo kont si nout pèp i domann arienk pou marsh an avan.

Zot va dir amoin sa mèm i apèl sistèm néokolonyal. Zot va dir amoin sa in sistèm i touf nout majinasyon. Dakor ! Mé kan mèm nou na lanspèk pou nou kal ali. A komansé lo légzanp bann péi i dévlop l’apré done anou. A kontinyé par nout l’imazinasyon é ni anmank pa. A kontinyé ankor par nout savoir épi nout savoir fèr. Pou finir par la kriz dann bann vyé péi kolonyal.
Zordi sink zanvyé. Alon fé in vé pou l’ané 2015. Alon désid ni sar trap nout dévlopman é nou va trapé… Sa la pa in métod koué ! Sa in métod « Bin la koué la ? », in métod pou avans pti-pa pti -pa dann shomin Granboi.

In kozman pou la rout : « In min i lav l’ot ! »


Sa in kozman, sanm pou moin li lé valab, pars li zoué bien lo rol la solidarité. Pou kosa ? Alé zot mèm ésèy lav in min par li tousèl. kisa, é kosa i sar savone ali ? Kisa é kosa i nétoiye son zong kan lé an dèy ? Kisa é kosa i tir bann ti voulvoul dsi li ? I fo in n’ot min pou fèr sa. Soi sé lo gosh i lav lo droit, soi lo droit in lav lo gosh : ala in solidarité lé bien obligatoir… Ala in n’afèr i pran sans prop, mé i pé prann dann sans figiré : la solidarité sa i pratik dann la sosyété, pli for i sokour pli fèb, pli fèb i rann la parèy kan son tour i ariv. Mi pans i pé done sa galman in sans sosyal, in sans politik, in sans sindikal… Kass in pé zot koko ! Fé bouy in pé zot matyèr griz ! I étoneré amoin si souvan dé foi ou sinonsa rant-rant ni tonm pa dakor.


Kanalreunion.com