Oté

Boir lo kalis ziska la li ? Apré avoir vann nout l’éritaz pou in pla lantiy

Justin / 26 out 2013

Pa arienk in foi mi parl sak i pé fèr avèk kann, é sak i lir mon kronik i koné bien kann sé pa arienk do sik, l’éstrésité, l’alkol épi lo ronm épi d’ot z’afèr i fé dopi in bon bout tan. Moin la di é mi rodi, kann sé in baz pou nou alé pli d’van dann shomin dévlopman nout péi. Moin la fine parl lo bio-plastik : sa i fé déza la-ba dan l’Itali, mé pa solman.

Pou kosa mi di sa ? Pars mi sort lir dann zournal “l’Ésprès” lil Moris in sosyété i apèl lo MSIRI — institi la roshèrch dann l’indistri sikriyèr — i sort fé in roshèch pou fé bann bio-plastik (i di galman agro-plastik) é lo bann rézilta lé bon. Bann shèrchèr la travay dsi bann fèy kann sèk épi dsi la vinass — zot i koné la vinas ? Sa in n’afèr i sort dan la mélas épi i dévèrs dann karo pou konm in zann d’fimyé. Lo problèm, sé ké li san lo dyab é dmoun i èm pa. Mé zété la pa bon, pa in bon solisyon... donk li ansèrv zordi pou fé bann agro-plastik.

Dabor inn, li lé bien rézistan… konm sak lé fé èk pétrol si zot i vé ! Arzout èk sa, li lé bio-dégradab an sis somèn, d’apré sak moin la lir. In l’inkonvényan ? Li kout pli shèr ké lo plastik fé avèk pétrol, mé o fon, zot i pans sa in l’inkonvényan ? Mi pans pa si lo bit sé protèz la natir épi an avoir in produi bien konm k’i fo é marsh dann shomin dévlopman.

Sa sé sak i fé Moris, é nou alor ? Nou la fine vann tout Téréos. L’èr-la, ni komann pi arien ! D’ot va fé bann roshèrch é pétèt nou va ashté lo bio-plastik èk zot, mé nou lé riskab, in foi anplis, rat shomin, rat nout randé-vou èk lo dévlopman. Konm di lo kont, nou lé riskab boir lo kalis ziska la li apré an avoir vann nout l’éritaz pou in pla lantiy !

 Justin


Kanalreunion.com