Oté

Bon dimansh a vnir, mésyé Fillon !

Justin / 30 novanm 2011

L’OCDE ? Zot i koné kosa sa i lé ? Sa in l’organizasyon intèrnasyonal pou èd bann péi dan zot dévlopman. Ousa li arèst ? Dan la Frans, dann shato "la muette". Mé sa i anpèsh pa li kozé, é koméla, kan li rouv son boush, an zénéral, sa i fé mal. La prèv ? Kou dsi kou, li sort anons, in bann péi la dèt lé marké "AAA" lé riskab oir son note dékaniyé. Arzout èk sa, li sort di, bann péi la zone l’ero i sort rant dan la résésyon. An plis ké sa, la Frans té i mazine son l’ékonomi nora goumant in pou san, i goumant ar pa plis zéro virgil troi pou san.

Ala k’li domann, in pé d’tan apré Justin, fé ankor uit milyar z’ékonomi. Donk lo dézyèm plan i sort pran nana dé-troi somènn i tyinbo pi la rout, la kaziman fine kapot dan la kivèt, vi ké li sifi pa. Bien antandi, i sava pran sa dan lo sosyal, pars bann la droit i koné arienk’ raz la pint lo sosyal. Donk raz la pint la konsomasyon. Donk fons la tèt l’ékonomi sou d’lo épi diminyé la kroisans, si i plonz pa lo péi dan la résésyon... Lé ga ! Mi sipoz zot la fine an avoir in kontrayété avèk la bank pars la bank i èm pa tro in kont kan li lé in pé fay-fay. L’èr-la, si zot na lo moiyin, zot i sèy diminyé zot dépans épi goumant in pé zot rovni. Si zot na lo moiyin, mi di bien. Sa lé pliské vré pou in péi ! I fo tash moiyin diminyé la dèt, donk diminyé lo l’intéré dsi la dèt, épi goumant lo rovni.

Sarkozy la di, li fé la politik otroman : li diminyé z’inpo dsi bann rish par proférans, konmsa bann moun friké va artourn dan la Frans pou pèy z’inpo. Mank de po, banna la pa artourné, é zot la rès l’androi zot l’arzan i fé plis pti. Donk, i rès solman anplis ké dépoz in bouké dovan Sin-Espédi, avann vèy la sétyèm lam... I rès arienk’pou raz la pint in foi anplis dsi lo sosyal. In dimansh si posib, kan demoun i atann pa. Bon dimansh a vnir, mésyé Fillon !

NB : OCDE : Organisme de coopération et de développement économique

Justin


Kanalreunion.com