Oté

Bon lané 2016 dan lantant !

Justin / 2 zanvié 2016

Vik tout sak la éspasé an 2015 la ba déor, sanm pou mwin domoun na pwin tro rogré pou fini èk lané la. Ek tout difikilté nout tout i koné, difikilté la vi boudikont, pou sak i travay, néna la pèr pèrd son lanplwa, sa in nafèr i pé angwass in moun, pou sak i travay pa néna langwass pou rod pou travay. La d’si an frans, 2015 té in lané lanfèr pou banna èk dé gro latanta, inn o débi, lot a la fin d’lané, sépousa néna i rogrèt arpa ditou 2015.

Pou la rényon osi, lané 2015 té pa tro in lané bandé. Touléka pou mwin na pwin tro gran shoz pou rotonir anndanla, pou di, té in lané romarkab. Donkalor nou lé dovan lo minm défi davan yèr. Pou nou, lo bann défi 2015 i rèt lo minm défi 2016. Pou abord lané 2016 sérin sanm pou mwin i fo daborinn la sékirité pou nout tout, pou an awar la sékirité i fo èt an pé partou, é déza dann son famy.

Pou mon par mi souèt zot tout in bon lané 2016, in lané èk plinn bon zafèr, bonèr pou tout, la santé pou tout, prospérité pou lo péi. Pou rolèv tout défi konm mi di la bon o, mi souèt in bon lantan dann mon famy, koman ni pé fé in bon lavansman si na pwin lantant ? Nou la bozwin tout la famyi ini. Alorss ni tras in tré d’si 2015, ni arkomans 2016 pli for. Ek mon famyi ini, mi souèt a zot in bon lané 2016, dan lantant !


Kanalreunion.com