Lakey lo sit > Chroniques > Oté
« Bon shien i shas de ras » – In kozman pou la rout
lindi 7 désanm 2015, sanm
Na lontan mi koné kozman-la. Mi pans, zot osi pars mi souvien dann plizyèr ka moin la antann dir in n’afèr konmsa. Mi souvien, in madam l’avé in garson té i èm bien l’éspor kour-déyèr bann fiy. In zour k’in moun la fé romark aèl sa, lo momon la di kozman an o la. In n’ot ka, in zour in jenn garson shinoi té apré sèrv bann ti kou d’sèk é li té i fé bien antansyon pa mète lo ronm pli k’i an fo. L’èr-la moin la antann in ga di ali lo mèm kozman.
Donk si ni pran la pène kalkil lo provèrb, ni pé dir sa lé dann lo san mèm sa : kisoi pou lo dragèr, kisoi ankor pou lo razèr d’pint kou d’sèk. Sa lé dann san, sa lé dann la natir é sa la pa in n’afèr ou i aprann a bien fèr si ou na poin kékshoz konmsa dann out zène.
Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète tazantan dakor rantre nou.