Oté

« Bon voizin, kouzin jèrmin ! Mové voizin pinèz morpin ! » - In kozman pou la rout

Justin / 23 séptanm 2015

Ofir-amézir demoun i viv antasé. Sa lé bon konm pa. Tout i dépann kisa sé out voizin. Li pé z’ète de bone konpagni, li pé z’ète galman difisil pou viv. Sa lé absoliman parèy ké dann travay : tout i dépann l’anbyans. Bon l’anbyans é ou i sana ou bien. Mové l’anbyans é la vi lé dir pou ou.

Bon voizin, ou lé konm an famiy : kouzin jèrmin ! Mové voizin é ou lé asiz dsi shardon : pinèz morpin [1] !

Kosa zot i anpans de sa zot ? Arien ditou ? Fé travay z’ot koko ! Fé fonn z’ot matyèr griz ! zot va oir ké rant-rant ni pé z’ète kékfoi dakor rantre nou.

[1Pinez morpin : solon A. Armand et Daniel Honoré, in kalité pinèz son pikir i fé mal baya !


Kanalreunion.com