Oté

Bon zélèv lo dévlopman dirab, astèr la vni krapo !

Justin / 26 zwiyé 2011

Mi koné pa pou kosa, mé défoi, zistoir lontan i romont ziska nout mazinasyon. Poitan, lé sir sa in n’afèr bien pézé désou lo poi sak la fine éspasé dépi, mé li nyabou romont anlèr. Pou kosa ? Pé sfèr sé par son iniversalité, sansa pars li rovien dann l’aktyalité mon péi. Donk, mi souvien, dann in tan, l’avé dann mèm sal lékol, kour moiyin, lo inn épi lo dé ; l’avé fin d’étide, lo inn avèk lo dé, épi l’avé in fin d’étide atardé. Lo métrès lékol té i apèl sa son bann krapo pars i fo dir zot té i fé pa gran-shoz. Mi koné pa pou koué, mé té dann fin d’étide atardé, moin l’avé mon bann méyèr dalon... pétète bann ga moin té i admir lo plis. San rézon ! Konmsa, sinploman.

Si mi di azot sa, sé pars na poin si lontan, bann minis, bann prézidan té i vien épi té i rovien La Rényon. In zour mésyé Borloo i vien vizite anou épi i di, nou mèm lé méyèr, nou mèm va ansèrv modèl pou la Frans, dann dévlopman dirab. Mésyé Villepin osi la vni. Mésyé Sarkozy épi toute in bann té apré flate anou, pas la pintir dsi nou. An atandan, té apré mète anlèr bann zènmi lo dévlopman dirab épi l’otonomi énèrzétik. La kote lé dir pou monté, mé lé rapide pou déboul dann fon. Dépi in pé plis in an, la fine ronons lénèrzi jéo-tèrmik, lo tram-trin… la ranplas l’otoroute informatik par in safe rapyèsté. Biensir, dann Por, Sint-André, Sint-Roz, Sint-Sizane, la pa ronons la modèrnité, la pa ronons bann zénèrji ronouvlab. Biensir, Sin-Dni la monte in projé d’klimatizasyon èk lo d’mèr. Mé lo fèr d’lans, la Réjyon, la fine bien bréshé.

Dépi in an, i fé vni plizanplis sharbon, plizanplis pétrol — 600 milyon l’ero siouplé ! La Possession l’apré fé in gran santral tèrmik èk lénèrzi fosil. Nout gran lélan la fine kalé. Sé pou sa ké mi pans, pèrsone i vien arpa pou vante anou, pou dir nou va ansèrv modèl ankor. Lo kapitol, konm di lo kont, lé kosté sanm la rosh tarpéène ! Nou lé pi bann premyé dan la klas. Konm di mon vyé métrès lékol, l’èr-la, avèk l’UMP é mésyé Didier, sé nou lo bann dèrnyé la klas, lo bann krapo, boudikont !

Justin


Kanalreunion.com