Oté

Bonbardman z’informasyon kab rann a nou ding

Justin / 21 séptanm 2013

Somèn dernyèr sinon sa débi somèn isi mèm, zot la pétèt antandi in l’aksidan ULM Piton Marcellin, parlfèt, mi koné mèm pa si na in rapor avèk le kan Marcellin, dann fon kasé la Rivièr de l’Est, kan ou sava gite Pas de Bellecombe, Volcan !
Bon, dé persone la pèrd la vi malérèzman ; l’aksidan sé l’aksidan ; mi sar pa koz san sèt-an la d’si ; lo madame transporté é lo pilote kaziman mor su l’kou.
Bann radio èk télé la parlé par d’si parlé ; i arèt pa. Konm di lot, té an boukle.
Land’min la mèm, ouala pa si out téléfone portab, m’saz i ariv… piblisité ; mé oua dir a moin, mé sé tou lé somèn ; rien a war èk le crash lo ULM. 
Nanpès, ou i vyin antann aksidan ULM, aksidan ULM, lé sékour la port l’opital, lé désédé.
Piblisité : « Tèl kompani télékominikasyon i ofr a ou pasaz ULM pou 2 moun, découvert l’il, gratuit tou sa la… ».
Oté kamarad, ti vé ti vé pa, i fo dan ton koko réfléksyon i tourn in kou : « Kosa sa, là, èk sak i vyin arivé, si in l’ULM la krazé dan la montagn, ti vé mi arsar rantr lad’dan ? Mèm si li lé gratuit, bon pé domoun noré pèr anbark toud’suit po toud’suit konm sa apré movèz nouvèl si la machine an késtion.
Lé vré, moin mi di, a fors giny tro z’informasyon, nou va fini par nir fou.
Nou lé bonbardé, sé pi a kou d’kanon, mé a kou d’zond radio èk télé.
Bonbardman z’informasyon kab rann a nou ding, non ?
Alé bon, rovoir, nopu artrouv somèn prosèn !

 Justin 


Kanalreunion.com