Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Accueil > Chroniques > Oté

Bonbardyé d’lo èk sharjèr d’lo

lundi 31 octobre 2011, par Justin

L’ané passé, moin l’avé antann dir sé lo bonbardyé d’lo ké l’avé nyabou kal dofé dann Maïdo. Touléka, si lété pa li tousèl, li l’avé donn in sèryé kou d’min. Ziska dan la somenn, pou moin, sa lété la vérité vré. Pa solman pou moin, mé pou bann moun myé informé konm lo mèr Sin-Lui, konm lo mèr Sin-Pol, ou sinonsa d’ot gran pèrsonalité. Touléka, pèrsone l’avé pa di, bobardyé-la, la ansèrv konm in zéro la gosh in shif. Tan-la lé révoli ! Astèr, méssyé préfé, épi tout batèr tanbour i antour ali, i pass zot tan pou dir lo bonbardyé d’lo i ansèrv de rien dann in sityasion konm la n’ote : na tro la montagn, na tro ranpar, lo tan i shanj toultan, épi dolo i mank anou.

Lé vré, lé pa vré ! Mi koné pa, mé si lé vré, mi pans madam Dindar, méssyé Klode Hoarau, madam Bélo épi tout lé z’ot nora di konète in n’afèr konmète konm sa. Mi pans, lo préfé, apré lo linsandi l’ané passé, nora di donn azot lo linformasyon. Anou mèm, bann ti-kolon, nou nora di an avoir lo linformasyon. Astèr, nou na poin la prèv ké lé vré. Pars, pou in pé dmoun nana in bout pouvoir, lé pa inportan di la vérité. Sak i fo, sé di in n’afèr mèm si i fo ramass mantèr. Sa la pa inportan dann bann rolasyon rant bann vaza épi bann ti-kolon. Sa la pa inportan pou bann moun i gouvèrn anou. Antansion ! Dann d’ot péi, i fo pa ou i trouv out lamizman dann la mantri, pars danzé i atann aou. Dann roiyome de Frans, kass pa la tète, lo mansonz sé in péshé vényèl.

Touléka, ala ousa nou lé randi : in foré k’i arète pa brilé, in bann zanimo shanjé an méshoui, in bann solda dofé i tonm konm moush èk somèy é in park lé-o plizanpli ataké. I tard pa, i parl arpi lo patrimoine l’imanité, mé l’ex-patrimoine nou lé mèm pa kapab défann. S’pandan, mi doute pa i sa trouv in bonpé rézon, bon rézon, mové rézon mé lo pli préférab sé pa arète konm poisson i fé bil dann bokal. Na poin arien lé nouvo dsou solèy. Nou téi vé lo bonbardyé d’lo, nou la gingn in bann sharjèr d’lo !

Justin


Un message, un commentaire ?

signaler contenu


Facebook Twitter Linkedin Google plus