Oté

Bone ané mon péi bien émé !

Justin / 2 zanvié 2013

Dé foi, na désèrtin mo toulmoun i di konm sa san pansé... san done vréman in sans. Sirtou san mazine sa i pé shanj lé shoz, kansréti in pti pé, aranz in pti pé lo z’afèr. Lé konm sa, kan i souèt in bone fèt, in zoiyé Noèl, lé konm sa sirman kan i souèt in bon l’ané… in bon érèz-érèz konm désèrtin i di. Pou kosa ? Pars si lo bonèr d’moun té i dépann de nou, nou noré in vré pouvoir dsi la manièr la vi i déroul. Ni oi bien sa sé in pouvoir nou na poin, nou bann ti kolon. Tout fason, sé in n’afèr i fo fèr, par onèteté o moin, par santiman kèk foi.

Kisa d’abitid n’i souèt in bone é érèz ané ? Nout fami biensir ! Nout bann dalon, sa lé normal ! Arzout èk sa demoun n’i koné ! Demoun n’i trouv zot sé d’moun bien. Demoun la rann anou sèrvis pars i fo an avoir in pé la rokonésans dan la vi. Demoun nou la rann sèrvis é zour-la nou la pans nou l’avé poin lo kèr maléré. San konté sak la marsh avèk nou dann in périod la vi é nou la gard in bon l’opinion pou zot. Tousa i kont mèm si ou i koné pa pou vréman sak in pé d’moun i pans de nou, é n’i koné pa, par avans, koman la pèrsone i sava pran sa. N’i koné pa si va bien pran lé shoz, n’i koné pa si va pran lé shoz konm in foutan. Sansa ankor va fé azot konm dolo dsi fèy sonz, konm la plui dsi la plime kanar. Lé konm sa, lé konm sa ! é pa otroman. Pétèt i fo pran é i fo done sa konm in bonzour, zis in késtion d’onèteté. In bonzour ou i souèt lo promié zanvié !

Moin la kan mèm anvi alé pli loin k’sa zordi. Moin la anvi souèt mon péi in bone ané. Mon péi ? La Rénion biensir, é pou kosa d’apré zot ? Si mon péi té bien, si li l’avé poin sousi, si li l’avé poin traka, si, konm di lo kont, lo sèt plé l’Égypt l’avé pa tonm dsi li... moin l’avé poin okin rézon souèt ali la bone é érèz ané. Si tout lété bon, si tout lété vayan, si toulmoun lo boujaron té plin, é si la moral toulmoun té bon, moin noré poin in rézon pou fèr sa... sof pétèt mon l’amour pou li ! Pars l’amour pou son péi, sa sé in n’afèr inportan. A jujé zordi l’éta li lé randi, mi pans sré pa d’tro tout Rénioné i souèt ali in bone ané. Mèm si son l’ané lé riskab èt mové. Mèm dan so ka-la... Bone ané mon péi bien émé !

Justin


Kanalreunion.com