Oté

Bone shans pou Guillaume Hoarau !

Justin / 11 zanvié 2013

Isi La Rénion, mi pans pa in moun i gnor lo nom Guillaume Hoarau : in marmay la kour la sot la mèr pou alé zoué foutbal dan la Frans. Dopi komansman la sézon foutbal, PSG la fé vni in bann védèt, é nout konpatriot, konm i di, na pi bokou d’tan d’zé. Sé pou sa li la désid alé dan in n’ot klèb. In tan li té i doi alé dan l’Anglétèr, apré li la shoizi alé la-ba dan la Chine. La Chine ?

Mi oi déza zot gro l’éspri. Zot l’apré mazine sa in l’éspès folklor ! Zot la pa tousèl, pars moin la antann in gran zournalis apré di, pétèt lo ga v’alé dan l’Anglétèr, pétèt dan la Chine, é aprésa li di : « Arèt in kou avèk lo folklor. Alé an Chine, sa la pa in n’afèr pou fé ! ». Bin voila, Hoarau (dan la Frans i di o-a-ro) la désid alé dan la Chine dann in klèb i apèl Dalian. Pou in bon paké l’arzan bien antandi. Li Hoarau li di galman, pars sa i korèsponn sak lo klèb i vé épi sak li pèrsonèlman li shèrch.

Zot i koné, nana déza Anelka épi Didier Drogba i zoué dan la Chine pars bann Chinoi i pans, zot foutbal la bézoin lokomotiv pou fé progrès ali. Arzout èk sa, ninport ki i pé dir, la-ba i zoué pa pou fé sanblan, la-ba i rod rézilta, pèrformans, é sak lé sir, sé k’dan kèk z’ané, la Chine sar in gran péi pou lo foutbal. Konm li lé déza in gran péi olinpik, in gran péi pou la natasion é lo rèst. Oubli pa, la Chine, sé dézièm péi nana dan lo mond pou son l’ékonomi. Donk, l’avnir pou in pé lé la-ba, é sé sak nout konpatriot i pans. Mèm si bann zournalist éropéo-santrik i konpran pa sa.

Astèr, pou plézanté, ni pé rapèl l’ékip de Frans i koné gou d’sèl bann Chinoi. Avann alé dan l’Afrik di Sid, zot la vni zoué La Rénion. Kont ki zot la zoué ? Kont la Chine, é si mi tronp pa, zot la gingn in batlavé. Donk, in pé la modésti siouplé... é bone shans nout Guillaume Hoarau.

Justin


Kanalreunion.com