Oté

Boug-la lé patriyote oui !

Justin / 20 avril 2010

In kado ! Demoun i èm byin kado demoun in n’afèr, kisoi pou in fète, kisoi pou in promyèr kominyon, kisoi ankor pou in maryaz, étsétéra, étsétéra, la ké lo ra... Sa lé vré rant bann partikilyé, sa lé vré ossi rant bann péi, é mi sorte romarké sa lé vré galman rant bann z’institisyon in péi.
La i anparl pa d’kado, mé dé foi i arsanm byin. Pou kossa mi di sa ? Pars si mi tronp pa, i diré la Réjyon Rényon i rode fé in bèl kado l’État déssi la késtyonn Protokol Matignon. Suiv byin l’afèr !
Dann Protokol Matignon, l’État té i doi vèrs dë some larzan, in milyar sisan milyon l’éro pou fé lo tram-train, épi nèf san trant milyon pou aranz la route littoral, é konm toute la goumanté, so foi issi, sé in milyar kat san milyon ké l’État i doi anou pou la route litoral. Sa lé prévi d’avans sa ! Donk sa i fé troi milyar. Sa larzan sa Baya !
Mé ala pa k’Bogoss Promyé, roi la Réjyon, la parti réklame in milyar sisan milyon pou fé la route litoral pars li vé anvoy tram-train dingué. Li arzoute, i fo k’i ardonn ali sink san milyon pou ashté lo kar. Konbyin sa i fé ? Dë milyar in boute pou nou, olèrk troi milyar. Di pa moin sa la pa in kado, mèm in kado patriyotik. Oté ! Boug-la lé patriyote oui !

Justin


Kanalreunion.com