Oté

Bravo pou la solidarité, rant frèr, rant kouzin, rantre nou

Témoignages.re / 5 avril 2012

Kan Olivier Bancoult la parl lo pétisyon li té i sar anvoy la Mézon blansh, moin la trouv té in bon l’idé. Pou kosa ? Pa pars moin té i kroi Obama té i sava rann bann Shagosien zot tèr. Si moin té i kroi sa, moin n’arté kroi Pèr-Noèl. Mi pans galman bann Shagosien lé pa non pli si tèt vid ké sa. Zot i lite dépi si tèlman lontan ké zot lé péyé pou konèt lé shoz lé pa si fasil pou bann pèp abandoné. Té in bon n’afèr, pars i fo touzour profite l’okazyon, é sa té in l’okazyon. Dézyèm z’afèr, kan moin la vi koman té difisil sign lo pétisyon, moin la di dan mon kèr : « Ala ankor in mové kou bann z’Amérikin ! Zot i done aou soi-dizan lo droi pou protèsté, mé zot tik-tak lé tèlman konpliké ké ou i vien pa bou ».

Anfin, koman-koman bann komité la rézistans épi la solidarité la mèt an marsh. Bancoult la vni La Rényon, li la koz dann télé, li la koz dann radio, li la vni l’asanblé zénéral Comité solidarité Chagos Rényon, é li la ésplik pou kosa té i falé sign pétisyon. Li la bien di, si vinn-sink mil pèrsone i sign, Prézidan Obama va ésplik pou kosa son péi nana in gran baz dann Diégo Garcia, é pou kosa bann Shagosien lé défandi d’sézour shé zot. Sirtou, aprésa, pèrsone i gingn ar pa di si nana in posibilité fé avans zot koz, bann Shagosien i tiliz pa.

In moi pou fé sign lo pétisyon par vinn-sink mil pèrsone, in konba pèrdi avann komansé. Poitan, Rényoné, Morisien, d’ot nasyon ankor la done la min bann Shagosien pou ariv o-bi ; la mèm dépas lo bi, vi k’vint-ui-mil é kèk pèrsone la signé. Bravo zot tout, bravo nout tout, pou la solidarité, rant frèr, rant kouzin, rantre nou.

 Justin 



Inn modékri, inn ti lavi, inn komantèr ?



Bann modékri andann forom






  • In bon l’artikl.

    Soman, di amwin si mi lé dann lérèr, mé mi pense ou la fé in fot’.
    Promié frase, "Kan Olivier Bancoult la parl lo pétisyon..."
    I ékri pa plito : "Kan Olivier Bancoult la KOZ lo pétisyon..." ?

    Mersi pou out répons.

    Article
    Inn modékri, inn ti lavi, inn komantèr ?






  • Oté soman va !!!

    Aster si kan én’ y koz é ke li en parl pas, alors à fér li koz si cé pour ress la mèm, à koz li koz, à fér li koz, pou kossa li koz, pou kissa li koz, cé justeman cé à forss kozé que lu la gaingne en parlé avec do mounn y compran pas son kozé.

    Eh ou ! ou la signé ce petission là ou ! ou la gaingne signé ! foutor bein ou lé bon si ou la gaingné !

    Eh ! si ou la gaingne signer, pas besoin kritik mon l’ékritir, moin sé un illétré en créole zistwar l’ékritir, ou wa.

    Soman moin té préfer voir que ou té y ékri "Kan Olivier Bancoult la Gaingne + de 25000 moun pou son pétisyon..."
    Di à moin oussa y lé la fot va !!!

    Article
    Inn modékri, inn ti lavi, inn komantèr ?


Kanalreunion.com