Oté

Brigad roz, oté ! zot i rapèl Brigad Rouj ?

Justin / 1 octob 2013

Na plizyèr manyèr mont in group domoun konm in troup militèr, “a mon komandman, gardavou ! repo ! arm si lépol droit ! An avan mars, inn, dé, inn, dé, inn dé !!! o opa kamarad, opa ; opa, opa, opa ! (bis)”.
Dimans là, moin té dan in vil. Si mon ti moto, moin té roul pa vit. Kosa mi voi si lot trotoir, koté in marsan légim, dé boug, an plis mi koné a zot, dé bo-frèr, inn la marié èk lo sèr lot, zot na 45 kan a pé pré. É bin ? zot té an ti-sheurt roz, mé roz alor, roz konm in bonbon. Konm mi koné a pé pré zot tik tak, dizon zot tourné viré, mi di : « Oté, sa bann sosyalis sa, la la fine ariv mèt in liniform ; 7 moi avan zéléksyon, i afis déza la koulèr — pars zot té pa tou sèl, mi diré bien navé dé-troi si mèm trottoir. Moin la pa konpri koué zot lapré fé ; la poin manifèstasyon, ou lé si la voi piblik, moin la pa antandi oparlèr, moin la pa vi in loto èk son mikro !!
Tout fason, la konpani éléktoral lé ankor loin ; vréman, moin té shoké. Si moin lavé vi in vré larmé lapré défilé konm in 14 zilié, noré moin shok a moin, sinon 3, 4 rélizièz èk zot gran rob noir ou blan, zot kapison si la tèt, in prosésyon koué, moin noré konpri, nou lé dimans, somanké i sar fé in pryèr Sint-Éxpédit pli loin, mé là vréman…
Alor, ou lavé Brigad rouj an Almagn, sak la parti tié Aldo Moro lé zané 60 ou 70 an Itali, ou lavé zénès itléryène, pétèt musolinyén an Itali touzour, mé là, an plin La Rényon, mon péi, an 2013, voir sa, mi koné pi si nou avans ou sinon sa ni rokil.
Brigad roz, zot i rapèl Brigad Rouj ?

 Justin 


Kanalreunion.com