Oté

Bril sak zot la adoré ! Ador sak zot la brilé !

Justin / 11 séptanm 2015

Shak somenn, lo vantredi, dopi in bon pé d’tan, nout Zournal i pibliy in biyé filozofik. Sa lé bien intérésan pou sak i lir. La-dan, konm son nom lé marké, i anparl tout bann sizé la filozofi-Filozofi konm zot i koné, sa i vé dir, si mi tronp pa, l’amour la sazès. Donk zot i konpran bien, dann in mond i marsh tèt-an-ba, lé bien nésésèr, tazantan romète ali dsi sé pate. Touléka, i fo ésèyé ! Mèm si la pa fasil !

Dousman, pous pa l’bato ! Mi vé pa ékri in biyé filozofik. Mi vé pa ranplas Orlu dann son l’égzèrsis akrobatik. Mé si moin l’avé, zordi, in biyé pou ékri, moin noré poz amoin in késtyon dsi lo solidité bann konviksyon politik shé lé z’inn é shé lé zot. Mi vé pa ète méshan avèk lé z’inn é lé z’ot mé kant mèm, i ariv ké mi poz amoin désèrtènn késtyon kan mi oi lo l’opinyon désèrtin i tourn koman zirouète dsi lo toi bann kaz dann L’erop. Romark zirouète li tourn dann lo diréksyon lo van i souf é sa lé normal, sa in tik-tak fizik ! Alé oir l’opinyon in moun, mèm in onm osinonsa in fanm politik, i doi pa shanj avèk lo van bann z’idé médyatik. Moin pèrsonèl sé sak mi kroi !

Na in pé i kroi pa konm moin ! Zot lé dann in parti i défann tèl z’idé. Si zot i pans, in zour, so parti la pi bon pou zot, ala ké zot i shanj parti-zot i dévir z’ot langouti – é zot i pran pou zot lo zidé z’ot nouvo parti, mèm si i tourn lo do san-pour-san avèk lo z’idé z’ot l’ansien parti. Par dsi lo marshé zot lé ankor pli asharné pou défann lo z’idé z’ot nouvo parti, ké zot lété tyèd pou défann lo z’idé z’ot ansien parti… Sé pou sa, souvan dé foi, mi domann bann résponsab mon parti d’rouj-de-fon kèl sé la fors z’ot konviksyon, pars moin la pèr si zot lé tyèd-tyèd zordi ké domin zot i dévir z’ot kazak san ké sa i déranz azot kansréti in pti pé.

Mi èmré, kant in moun i shanj parti é ké li shanj z’idé ké li ésplik, sirtou si li sé in onm ou sinonsa in fanm politik, ké li di anou, dsi Face-book par égzanp, kosa l’amenn ali a shanj l’opinyon. Si li gingn éspliké avèk in bann z’idé i sort dann son fonn d’kèr, tanmyé ! Li pé pran lo bann z’idé son nouvo parti mé si li i gingn pa, l’èr-la l’opinyon piblik lé an droi poz ali késtyon. I pé dmann ali pou kosa, zordi par raport a yèr, pou kosa li bril sak li la doré, é pou kosa li ador sak li la brilé.

NB Si zot i trouv sa i rosanm in moun zot i koné, sé lo pur l’éfé d’lo azar. Konmsa mèm i di sa dann liv !


Kanalreunion.com