Oté

Cospar : Lé konmsa é pa otroman !

Justin / 10 août 2009

I antan souvan-dé foi, d’issi-d’la-ba, dann magazin, dann déssèrtin radyo, demoun dir Cospar la pa fé aryin. Toute lé parèy, an pli pir k’avan : la vi lé touzour shèr épi la moné lé rar kaziman konm korn lapin. Konm kréol i èm pa kontrayé, sa i rèss la konmsa, épi lé pli fasil anparl, konm in pé i di, dann péi déor, bann trin i ariv an rotar plito k’sak i ariv zis-a-l’èr.
Solman, dir in n’afèr konmsa lé fasil, sirtou si ou i gnor la vérité. La pa kal la goumantasyon bann marshandiz dann gran sirfas ? Boutèy lo graz, lo pri la pa diminyé ? La pa gingn in moné déssi l’alokasyon lozman ? La pa kal bann bank dann z’ot koméraz lo fré ? La fine obli lo rsta don, mèm si la pankor vèrsé ? Tousa bann travayèr i sa gingn in goumantasyon déssi z’ot larzan lo moi, sa i kont pa alor ? Sinkant éro, sa la pa aryin...
Lé vré nana domoun té i kont déssi d’ot shoz épi la pankor vi la koulèr, d’ot rovandikasyon lo Cospar. Oui, rovandikasyon ! Moin la byin di, rovandikasyon, pars Cospar la pa gouvèrnman : li domann, li kri dann shomin, li fé manifèstasyon mé la pa li k’i déside… Lé konm sa é pa otroman. Oplis na d’moun i manifèst, oplis ou i pé gingn satisfaksyon. Lé konm sa é pa otroman.

Justin

Iésplikasyon inn-dé pti mo :

Souvan-défoi : tazantan.
D’issi-d’la-ba : par issi, par la-ba.
La goumanté : la monté.
Pli pir k’avan : pli mal k’avan.
Rar konm korn lapin : lapin la poin korn(oui matlo !).


Kanalreunion.com