Oté

D’su kèl planèt li viv don ? Sirman pa d’su la tèr !

Justin / 5 désanm 2011

Na dé shoz inkroiyab, mé vré ! Prézidan la Réjyon i pass dann télé. Pou kosa ? Mi rapèl pi, pars pou in oui, pou in non, mèm pou arien ditou, la télé i rosoir ali. Touléka, so kou isi, lété pa pou parl la sityasion zénéral dan La Rényon, mé son kozman l’ariv konmsa. Donk, boug-la la di, La Rényon i débrouy pa tro mal mèm èk la kriz, i débrouy plito myé ké lé z’ot réjyon.

Poitan, mèm somèn, ni sort an avoir bann shif ofisyèl i amontr pa sa ditou. Pou l’anploi, nout réjyon lé klasé dèrnyé dan l’Erop èk 29 pou san shomèr dan la popilasyon aktiv. Nana soisant pou san bann jèn na poin travay. Plis sinkant pou san d’moun i viv dosou lo sèy povreté, an parmi in bon poursantaz de moun vréman mizèr. Arzout èk sa, plis 129.000 personn inskri pol-anploi konm domandèr travay niméro inn. Parl pi bann niyaz l’apré antasé dan nout syèl ékonomik. Bann patron batiman i kalkil i sava ankor lisansyé 6.800 travayèr dann batiman l’ané k’i vien. Arzout èk sa, lo nonm RSA i arèt pa goumanté.

Ala bann shif ofisyèl. Ala bann shif l’INSEE i donn épi l’Erop i donn galman. Mé ousa prézidan i tir son konklizyon d’su la santé nout l’ékonomi ? D’su la frékantastyon bann z’otèl do liks ? Domaz sa la pa in zénéralité. Mon kamarad Zanbash la di amoin, solon li, prézidan té i vienn gingn son rolvé d’kont la bank é li la vi lo gro l’arzan i tonm fin di moi, donk li la pans, La Rényon, konm li mèm, demoun nana lo pourkoi. Mé mon kamarad Zanbash-la, sa i èm plézanté sa !

Pou mon par, mi domann amoin solman : "D’su kèl planèt boug-la i viv ? Sirman pa d’su la tèr !".

Justin


Kanalreunion.com