Oté

Dabitid, banna, lo kèr lé larz konm in fèy lo tin !

Justin / 12 avril 2016

Kan ni argard zalantour d’nou ousinonsa in pé partou, dann rolasyon travay, ni pé pa di bann patron lé zénéré pou de vré èk travayèr. An zénéral, banna néna plito lo zié pli gran k’lo vant, o plis néna o plis i vé an awar. Dérnié tan nou la vi ankor komansa banna lé gourman, é komansa san fé dézord, zot i fé fason pou byin kashièt zot larzan. Konm sa minm bann zournalis la dénish in pé lèr la. Néna osi sak i bar an misouk èk in rotrèt shapo.

Pwatan i ariv tanzaot trouv inn-dé néna bon kèr. Mi sort antann lèr la in gro patron in bwat lasiranss, in bèl bwat minm, avan alé la rotrèt lo patron la désid partaz in pé larzan èk bann travayèr. Konm i prétan nora pou tout, 8000 salarié, néna an Ind, an Italie, an Éspagn, vik sé in bwat intérnasyonal, an Frans, dan lo nord, banna té atan pa, lé vré nou na pwin tro labitid war sa.

Lo patron i di pou rézon si li néna pou gaté zordi sé par rapor lo travay de shakinn é konm rokonésans li dwa romérsié inn é lot. Néna lé sirpri, i prétan dir lé pokor rant dan lé koutim an Frans. Minm moman ousa an frans banna i rod manièr pou raz la pint touzour èk la lwa El-konmri, lé vré lé sirpronan, dabitid, banna, lo kér lé plito larz konm in fèy lo tin. Lé rar mé néna ankor konm i di !


Kanalreunion.com