Oté

Dabor, mète Sarkozy déor ! Aprésa, mète do boi avèk lé zot !

Justin / 11 avril 2012

Mi koné pa si zot la bien ékout bann kandida i vien fé zot prèsh La Rényon pou zéléksyon prézidan La Répiblik. Mi pans zot va bien ékout bann kandida va prézant dépité. Mé, si zot i intérèss de sa, moin lé sir zot la fine konprann in n’afèr. In n’afèr sinp pars in bon program, sa la pa konpliké pou fé. Biensir, in pé i mète in pé dantèl otour. Pou koué ? Pars i fo fé sanblan ou la trouv in bon n’afèr. Alé oir, sak lé bon la fine trouvé, lé la, é demoun i koné kisa la trouv bann z’afèr-la.

Kèl z’afèr ? Zot va oir toutsuit, program kisa, san zène azot, banna i dévlop. Si i di lotonomi énèrzétik, si i di ossi l’otosifizans alimantèr, si i di tram-trin, sansa in gran sèrvis proksimité, ou bien l’anvironeman... Zot i konpran nou l’apré anparl program parti kominis la mète o-poin pa arienk zordi, mé dopi in bon koup de tan. Arzout èk sa, si i parl in l’ède pou dmoun pov épi d’ot z’afèr ankor, zot i konpran ousa program-la i sort. Lé tris pou dir, mé bann moun la vni La Rényon, la pa invant lo tyède, pars bann Rényoné i koné kosa k’i fo pou zot é myé ké dé-troi gran vaza, gran dékouvrèr, gran amontrèr dovan l’éternel.

Astèr, nout tout i koné kosa i fo fèr, kèl program i fo k’i aplik, mé kisa k’i vé aplik program-la pou vréman ? Pars marshann parol konm Sarkozy la, sa i mank pa. Mé bann batisèr, pou vréman, sa lé rar. Donk, sak i fo rodé sé l’moun kapab vanjé pou aplik in program toulmoun i koné. Sarkozy la fine donn la prèv, li vé pa aplik sa, mèm si sa lé bon pou nou ; donk i fo anvoy ali dingué, é dress lo rin avèk lé z’ot, pou in bon programm pou nou. Mé dabor, mète Sarkozy déor ! Apré mète doboi èk lé z’ot !

Justin


Kanalreunion.com