Oté

« Dan blan, kèr noir » - In kozman pou la rout

Justin / 9 zanvié 2016

Kosa ou i oi an promyé dsi in moun ? Sa i dépann sak ou i rogard an promyé pars shakinn nana son mani. Mi souvien in ga té i di amoin, dsi in fiy, promyé z’afèr li rogard sé lo pti vant. In n’ot téi di li rogard lo zyé an promyé… Nana d’moun kan zot i rir, sak ou i oi sé z’ot doub ranzé lo dan. I di z’ot domino lé déor ! Sa sé in n’afèr i pé pa kashyété. Astèr, alé rogard lo kèr : sa lé inposib. Sirtou kan lo kèr, pou ou, sé lo santiman. Alé konprann promyé kou d’èy si in moun nana bon sansa mové santiman.

Ou i romark ali dann son l’aparans, mé pa dann fon son kèr. Pou sa, i fo ou i pratik ali bien. Si tèlman ké, in zour, ou i an apèrsoi si lo l’aparans lé korèk, lo fonn-kèr la pa bon. Inn i zir avèk l’ot, konm lo blan i paré i trok avèk lo noir [1] ! L’èr-la ou lé dési mé la vi lé konmsa.

Kosa zot I anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir, ké rant-rant ni pé z’ète, tazantan, dakor, rantre nou.

[1I fo ni rovir la dsi in zour santardé


Kanalreunion.com