Oté

Dan la bib, in ga la shanj son droi d’énès pou in pla lantiy

Justin / 21 juillet 2012

Yèr, nou la anparl bann éstajyèr gouvèrnman i vé anvoy an France pou fé zot éstaj. Moin la di kosa mi pans de sa : Inn, mi pans, isi lé posib pou zot fé in éstaj amontrèr osi valab ké la-ba. Dé, konm nana la plas isi, mi oi pa pou kosa va anvoy azot la-ba. Troi : lé pli préférab lès isi bann amontrèr kapab konprann koz kréol, alé oir bann shartèzèr lé plin d’moun i konpran pa nout z’anfan kan i koz. Mi arzout èk sa, bann z’ansien éstajyèr, lé dir pou zot artourn La Rényon, pars lo shartèr lé toultan plin. Troizyèm z’afèr, moin la antann yèr matin, vinn-sink pèrsone la gingn zot konkour, banna i anvoy azot an éstaj dan la France... Vinn-sink plas, sa i pé trouvé ! Epi, koman-koman, sanm pou moin, zot na la priorité par rapor bann shartézèr.

Donk, banna la parti rod madam Bello pou apiy zot domann fé zot éstaz isi. Sé zot droi, épi sa i amontr zot na konfyans dan lo madam. I paré, lo dépité Bello la di azot, group azot pou alé négosyé zot ka, inn par inn. Moin la koni in tan ousa madam Bello té plis désidé ké sa pou défann demoun La Rényon. Domaz, èl la pa antann bann dépité martiniké dsi mèm késtyon : banna té pa fléksib konmsa zot ! Moin la pa antann non pli bann dépité la vot la konfyans lo gouvèrnman pran parti dann dosyé-la. Mi éspèr banna i done pa in shèk an blan gouvèrnman Ayrault pou défann nout z’intéré.

Amoins ké shakinn nana in kékshoz pou négosyé pli inportan ké sa. Par égzanp in pol médikal dan l’Ouèst. Par égzanp in dégajman la rout litoral koté Sind-Ni, é d’ot shoz ankor... Sak moin lé sir, sé ké shakinn va trouv pli intérésan aranj son travay konm mèr plito alé fé son vré travay dépité. Dann in tan, in pé té i vé Konsèy réjyonal té pran la plas lo mèr pou zoué son rol. In pé i di konmsa, sé pou sa Vèrgès la pèrd z’éléksyon 2010. Dann la bib, nana mèm in ga la shanj son droi d’énès, donk son l’éritaj pou in pla lantiy. Mi pans zot i koné z’istoir-la.

NB : Isaac la vann son droi d’énès son frèr Jakob pou in pla lantiy.

Justin


Kanalreunion.com