Oté

Daniel Narcisse, pli méyèr zouèr and-bal l’ané 2012 !

Justin / 10 zanvié 2013

Mi koné pa si in moun konpétan la fé z’étid dann in séktèr La Rénion na bon rézilta. Pou kosa i fré in n’afèr konm sa ? Pars bon rézilta, sa i ariv pa par azar ! Sa vien par la tradision, par l’édikasion, par bann moiyin i mèt dodan, épi i fo dir osi, kékfoi na in zénérasion éstraordinèr i ariv. Dann fout-bal la Frans, demoun i anparl souvan la zénérasion Platini, Girès, Fernadèz. Banna la gingn bon rézilta. L’ékip de France 1998, l’avé galman in bann kador la-dan. Sa sé sinploman pou ilistr in pé sak moin la di an-o la.

Sa sé pou la Frans, é pou nou La Rénion ? Akoz in pti péi konm nou nana bon boksèr, bon karatéka, bon zouar la pélot bask, bon fout-balèr... é oubli pa bann bon and-balèr, fiy konm garson. Momandoné dan l’ékip la Frans, l’avé troi bon zouèr dan l’ékip garson épi troi bon zouèz dan l’ékip bann fiy. Arzout èk sa, kan té rogard bann l’ékip and-bal, dan la Frans, l’avé trouzour inn-dé Rénioné. Nout tout i koné lo nom bann shanpion. Nout tout té fièr kan zot té i zoué bann gran-gran match.

Nout tout i koné Jakson Richardson, lo ga lété méyèr zouèr and-bal dan lo mond antié. Na in pé d’tan, mé bann jèn i koné ankor sa zordi. Astèr nana Daniel Narcisse. Rénioné-la la fine gingn in bon pé titr. Si mi tronp, lé dé foi shanpion olinpik, sépa konbienn foi shanpion di mond, inn-dé foi shanpion d’Erop, li la zoué dan bann gran-gran klèb. San vanté, mé in karièr konm li nana déza, sa lé pa si fasil an avoir.

Na in ga la di amoin : nou Rénioné, nou nana souvan défoi in bon pé z’atou dann nout jé. Défoi ni ansèrv bien, défoi ni ansèrv pa bien. Pou kosa ? Pars l’anspèk i mank pa, mé in zour, kan nou va niabou déblok lo l’anspèk, nou nora promès pou l’avnir.

NB : Moin té sar fini mon modékri, san di, dann komine La Possession, na i konplèx ésportif Daniel Narcisse. Sa in nom pou mèt anou anlèr sa ! Bann jèn i pé gingn modèl la-dan.

 Justin 


Kanalreunion.com