Oté

Dann in péi nana bonpé rokin épi in gran-gran-gran kantité bishik !

Justin / 26 zwin 2012

Moin la fine parl azot Simon Lagarrigue travayèr, maloyèr, rézistan. Moin la anparl azot dé li kan in fime dsi li la pas dann télé. Simon i koz souvan dé foi an parabol konm in ban pé rantre nou. Kan li koz dsi dmoun mizèr, li di kékshoz konmsa : « Dann vant rokin, i pé trouv gro poison. Dann vant gro poison, i pé trouv moiyin poison. Dann vant moiyin poison, i pé trouv poison pli pti, é dann zot vant, i pé trouv bishik. Rouv lo vant bishik, i trouv pa arien ! ».
Mi pans son réfléksyon i pé ramène anou dsi la késtyonn lo dézéspoir demoun pov isi La Rényon : bann pov lé rézigné, mèm si tazantan zot i vanj in kou, zot i révolt in kou, épi souvan-défoi, in pti pé rant zot i kas, i briz, konm pou dir : "Si nou na poin arien, pou kosa d’ot nana ?". Na poin lontan, moin la vi in fime dsi France O. Fime-la té i anparl dsi Sodron épi té i sèy amontr na in spès révolisyon dann kartyé-la. Sanm pou moin banna té i vé dir, bann problèm Sodron té apré trouv in solisyon ; na mèm in ga banna la dégiz ali an éro la révolisyon 1990-1991. Lo boug té apré di : koméla i kas pi, koméla i diskite pou konète koman i démonte bann politik.

Lé fasil di in n’afèr konmsa épi pétète in pé d’moun lé kontan klout bann z’om politik dsi la kroi. Mé pou lo "arète kasé-brizé", nou va rovoir pli loin. Pars, si mi tronp pa, apré la fé lo fime, la kasé-brizé dann Sodron, é moin la bien pèr lé pa fini, dann Sodron konm dann tout kartyé la mizèr lé antasé... Donk, si sak moin la di an-o la lété la konklizyon lo fime, konm di bann zorèy, nou lé a koté la plak. Pou koué ? Pars lo l’ènmi, lo politik, la pa in l’ènmi, sé in bouk-émisèr. Pars ziska zordi, lo bann solisyon la apliké la pa bon solisyon : sak bann i amontr dann fime i pé ète in bon solisyon pou inn-dé moun. Sirtou dann in péi nana bonpé rokin, épi in gran-gran-gran kantité bishik.

NB : Si fime-la i arpas, agard ali bien. Mi pans nana do koi fé travay nout koko !

Justin


Kanalreunion.com