Oté

Dann l’intéré lo pèp rényoné !

Justin / 23 mars 2010

Shak zour mi lir nout zournal on the web, kan mon linternet i vé byin fonksyoné... pars kan li vé pa, li vé pa ! Donk shak foi mi lir nout zournal, mi oi in zimaz kouvèrtir liv. Lo tit lo liv ? “Fraternité é rékonsilyasyon”*, èk la foto dë pèrsone, Debré épi Vergès. Ala de moun la pa batay pou plézanté, la shoké, é kan mi di "shoké", la pa pou fé sanblan. Poitan, la fini par fé la pé. Poitan, la fini par rékonsilyé. Konm Mandéla, la fini par rékonsilyé avèk Deklèr, dann l’intéré zot péi, l’Afrik di Sid.
Alor, kan somènn dèrnyèr, moin la antann toute sort kalité kozman kan TAK la groupé avèk l’Alyans, kan moin la antann inn-dé déklarasyon, pou in pé té i sorte dann fonnkèr, pou d’pote té aryink pou fé l’ipokrite... moin té a d’mandé si lo van listoir la pa arète pri dann bransh pyé d’boi san ariv issi. Moin té a d’mandé si pti konm ni lé, avèk toute sort kalité problèm, lété rézonab an avoir in klima la guèr sivil konmsa. Moin té a d’mandé ankor si déssèrtin i souète pa, dann fon zot kèr, ni rékonsilyé pa, konmsa zot i pé kontinyé gingn fé zot plote-lésploitasyon, trankilman, alé oir in bon pé i arèss dann fon kivète.
Donkalor, rékonsilyasion épi fratèrnité, oui ! Mé avan sa, si in pé la fé fote, akoz pa rokonète son tor, domann éskiz, domann pardon, dann in sèl l’intéré : l’intéré lo pèp rényoné.

*in liv Ary la ékri

 Justin 


Kanalreunion.com