Oté

Dann voi d’garaz, in poin sé tou !

Justin / 13 janvier 2010

Matante Zélida la ékrir Justin :
Mon shèr nové, mon spès salté, tou lé zour mi priyèr bondyé, provik moi d’mars i ariv é k’mi oi bann rouj-de-fon pran lo fon. Mi priyèr bondyé pou k’in vré Droite i rant la Réjyon konm prézidan. Pars l’assé, l’assé é l’assé voir azot dann la piramide ranvèrsé. Kan l’èr va soné, sof kok va fé, mé o-moins lo moun va shanjé, é avèk lo moun, lo bann gran projé in pé i souète k’i ariv va nyabou d’kapoté. Dizon, pou mon par, aryink pou byin gard z’ot figuir assiz. Tok ! Pran sa pou toi !

Justin la fé aèl pou répons :
Mon vyé matante, k’i koz plizanplis la boush rouvèr... sak ou i di i étone pa moin, pars ou ossi, ou i fé parèy bann shèf la Droite. Zot i koné pa tro sak na pou fèr. Afors pa propoz aryin, zot na pi d’projé sof kass sak la fine byin avansé épi an anpèsh lé z’ot avansé, mèm si lo gouvèrnman la Frans la fine déside apiyé. Nout koté, ni rogard si nana konm i di in prozé altèrnatif kont sète l’Alyans, é ni oi pa. Pou nou, sa i vé dir nou lé dann bon shomin, nou lé dan la bone voi... é lé z’ote, konm i di la-ba dan la Frans, zot lé dann voi d’garaz, in poin é sé tou !

Justin


Kanalreunion.com