Oté

« Dann vyé marmite, i fé bon kari. »

In kozman pou la rout

Justin / 21 mé 2016

Sé sak mi antann souvan dé foi é mi domann amoin touzour pou kosa : pétète la pèrsone lé abityé avèk son marmit ; el i koné kansa lo zoignon l’apré vni roz, li koné lo kantité d’lo, lo dégré d’sèl-lo sèl la klé dann kari.

Mi pans la persone i koné mèm dann kèl éta i lé sonkari kan èl i antann son marmit shanté. Astèr kosa i vé dir nout kozman o-zis ? Ni pé oz in komansman l’ésplikasyon. Ni pé di par ébzanp in bon tik-tak sé in tiktak ou lé bien antréné pou fé. Mi souvien mon papa l’avé in vyé fizi avèk in tib rédiktèr : son kalib 16 té i tonm kalib 12, pa fizi mé karabine é li téi mank ni mèrl, ni tortrèl, ni pèrdri, ni pizon ramyé.

Mé a bien kalkilé lo zoutiy lé pou kékshoz é lo z’ouvriyé osi lé pou késhoz. Pars avèk son vyé flingo in n’ot moun té riskab loupé. Lé vré la pa vré ?


Kanalreunion.com