Oté

Débat, débat pou la po patat, épi Sin-Dni i rès an pane !

Justin / 22 mars 2013

Vantièr, Rénion Promièr la roganiz in déba dsi son télé rant promié adzoin la komine Sin-Dni, mésié Maillot, épi mésié Morel, in l’ansien promié l’adzoin. Pou kosa in déba rant dé moun-la ? Pars la komine i rolans lo "Pol Oséan" ké li batiz "Éspas oséan". In déba pars inn lé pour é l’ot lé kont ? Non va, inn lé pour é l’ot lé pour. Mé inn i trouv té i falé sink-an pou arfé lo projé é l’ot i pans in-an té i sifi. Ala in bon l’okazion pou débat ? Dizon la débat pou la po patat.

Dabor, mésié Morel la pa asplik anou pou kosa, dann tan Victoria té lo mèr, li té kont prozé-la. Moin pèrsonèl, mi pans li té kont arienk pou mèt in kal son mèr, vi k’li té lo promié l’adzoin !

Dézièmman, lo promié l’adzoin koméla la pa ésplik bann demoun Sin-Dni pou kosa la komine la shanj projé dé foi avan artourn dsi lo mèm projé kaziman. Pars, o ka zot i rapèl pi, mi souvien, apré avoir tras in kroi dsi Pol Oséan, la di in kou i sava fé in parking l’androi-la, épizapré la di i sava fé in gran l’imèb avèk parking otour. Pou finir par di, so kou isi va fé sak moin la marké an o-la.

Tousala la fé pèrd Sin-Dni sink-an. Près siz-an. Pou kosa ? Pars la pankor dépoz pèrmi pou fé sa. La i di, lo moi oktob va dépoz lo pèrmi. Aprésa i fo atann lo tan k’i fo, épi nora konjé batiman, nora mèm mové tan pétèt, épi nou va rotrouv anou moi d’mars 2014, zis lo tan done in promié kou d’piosh é sar lo z’éléksion... Z’éléksion ? Pou in nouvo mèr ? Mé si lo nouvo mèr sé pa lo mèm é si li osi li vé fé son l’intérésan son tour, si li osi li vé démont lo prozé pou arfé in n’ot. Kosa v’arivé ? Ni koné pa. Siz-an anplis pou arlans in nouvo projé ? Sa v’amèn anou l’ané 2024 ?

In bonpé l’okazion pou bat tanbour, in bonpé l’okazion pou débat pou la po patat. Tanpi si Sin-Dni i rès an pane !

NB : In pansé pou mésié Maillot. Pa l’adzoin lo mèr, mé l’ot, sak na trann-siz-an l’ansièneté é li lé touzour prékèr. La titilarizasion i pas koté li san arété, èl i préfèr d’ot mié koni, mié shoizi. 

Li la ménas zèt son kor. Lo mèr la di ali pran pasians, pétèt l’ané proshèn va pans ali.... Domin i raz gratuit ! Konm touzour.

Justin


Kanalreunion.com