Oté

Demoun oki nana ! Mé d’moun kouyon lé plizanpli rar !

Justin / 28 zanvié 2010

Yèr matin, moin la antann dann radyo, l’avé in l’anboutéyaz déssi la rout Tamarin, dann sans Sin-Pyèr-Sin-ni. Sa sé in n’afèr k’i ariv pa souvan, mé yèr l’arivé. Pou kossa, solon zot ? Pars d’apré sak i di, dé loto l’a anbrassé pa tro loin lo pon la Rivièr dé galé... Mi antan inn-dé mové lang apré di konmsa, l’avé pourtan di ké noré pi lanboutéyaz kan va rouv la rout Tamarin ! Poitan, moin la pa antann in n’afèr konmsa dan la boush bann résponsab la Réjyon. An kontrèr, moin la antann azot dir i fo pa kroir la rout Tamarin va règ tout problèm la sirkilasyon, é k’i falé kont déssi plizièr manièr pou déplasé… a komansé par lo tram-train.
Moin la mèm antann dir, par la boush bann dirizan la Réjyon, si i fé pa lo tram-train, lé riskab an avoir in koma sirkilatoir... pa zordi, pa domin, mé firamézir nout popilasyon va rogoumanté. Alors, i ansèrv de riyin déform bann parol demoun résponsab, fé dir azot “b” kan zot la di “a”… kan zot la di in n’afèr, fé dir azot lo kontrèr.
I fo dir la Droite lé kont lo tram-train, é i vé mèm fé in référandome la-dsi. Prézidan la Réjyon la fine réponn : sé lo zéléksyon rézyonal ké sar in référandome, par li mèm ! Rant lo tram-train épi sak i vé pa d’li. Rant li épi sak in pé i propoz, sansa va propozé, d’ote kalité manyèr déplasé.
Par l’fète, zot i koné kossa la Droite i propoz… oté ! Banna i di lo kar va zoué mèm rol ké lo tram. Pa n’inport ékèl kar, mé bann gran-gran kar... dizon par l’fète bann kar-l’akordéon. Konm di lo kont : « Demoun oki nana, mé d’moun kouyon lé plizanpli rar ! ».

Justin


Kanalreunion.com