Oté

Dévlop tourism, mé zis konm i fo, é san ésploite travayèr !

Justin / 7 novanm 2012

Matant Zélida la ékrir Justin :
Mon shèr nové, mon spès salté,
Moin la tandi dir, parti bann rouj-de-fon i krétik Didier Robert pars lo boug i vé dévlop tourism La Rényon ; li vé fé isi in tèr pou lakèy sisan-mil touris. Konm Maurice ! Bin, mi pé dir li la rézon, mil foi rézon, pars touris an kantité, sa i amène larzan an kantité. Sa i done travay in kantité d’moune, é kan d’moune na travay, mi pans zot lé kontan ; zot lé fyèr. In légzanp : mi sort alé Maurice é moin la romark, par bann touris lo péi la bien dévlopé, mèm k’i shanj zour-an-zour. Tanpi pou bann margognèr dan do, mé mésyé Didier, moin lé sir, i fé bonpé z’afèr pou La Rényon. Tok ! Pran sa pou toi !

Jistin la fé pou répons :
Mon vyé matant k’i koz touzour la boush rouvèr, 
Kan i parl tourism-la, i fo fèr atansion. Mi pans pa i fo fé vni tourism an tro pars, momandoné, ou lé pi shé ou, ou lé pi dan out péi. Mi sort fé i tour Grand-Bay, in zanr d’Sin-Zil-lé-Bin. Tourism lé foulé : zot lé partou, partou, asiz, koushé dsi la plaj, dann kanote, flanké dsi bann fotèy. Zot lé la konm bann vaza... é bann Morisien ? I tourn otour pou sèy gingn in pti zourné : ... Si zot lé pa dsi la plaj, zot lé dan bann gran sirfas ! Gran mi di aou ! Sak La Rénion i arsanm boukan dé fèy koté banna.
Dsi la késtyonn salèr ? Moin la vi in jène fiy la gingn in boulo konm késyèr dann in gran sirfas i tonm La Croizète. El i travay dopi diz-èr lo matin ziska diz-èr lo soir. Bien péyé ? Kroi aou ! Sink-mil roupi par moi, donk 130 éro par moi. Donk, si i vé dévlop tourism, dakor, mé zis konm i fo, é san ésploite nout pèp kant mèm. Tok ! Pran sa pou ou !

 Justin 


Kanalreunion.com