Oté

Dévlopman dirab la poinn koulèr ?
Pa sir ditou

Témoignages.re / 8 août 2012

Mi koné pa si zot nana intèrnèt. Mé si zot nana, lé posib an avoir in kantité z’informasyon dsi dévlopman dirab in pé partou dsi la tèr. Sé konm sa mi sort oir dan l’intèrnèt la-ba a koté in gran vil, dan la France, i apèl Dijon, na in komine i apèl Chenove. La pa in gran komine, vi k’li nana solman kinz-mil pèrsone i arèt dann vil-la. Bin akoz mi anparl de sa ? Pars komine-la la désid anbèk dann dévlopman dirab, é mi pans li trouv son kont : son popilasyon i goumant firamézir, la vil lé pli prop, l’anploi i dévlop. Pou moin, vil-la i tras in bon shomin.

Kosa li la fé pou vréman ? Pou komansé, li la aranz bann batiman piblik tèl fason k’i konsonm in pti pé kouran. Anplis ké sa, la komine l’ashèt bann véikil éléktrik pou son sèrvis l’aménajman. Son sèrvis l’éspas vèr i done l’égzanp pars i tiliz près pa bann produi shimik. Arzout èk sa, dsi lo toi la méri la fé in l’élvaz moush-a-myèl. Biensir, bann z’anfan i mèl la-dan é lo mèr la invit azot pou lo promyé ramasaz do myèl.

Zordi, mi parl in vil lé loin par rapor a nou, mé moin lé sir galman, dsi bann vil konm Lo Por, Sint-Sizane épi d’ot ankor, nana z’afèr pou fé konèt dann dévlopman dirab. Mé pou sa, i fo bat tanbour, pou amontr isi galman nana dé shoz ké ni fé é i pé ansèrv l’égzanp... Par l’fèt, zot i koné, lo mèr Chenove lé sosyalis, mé li, pèrsonèl, li tourn pa lo do avèk dévlopman dirab. Donk, i pé di, dévlopman dirab la poinn koulèr politik ? Sa, moin lé pa sir dsa ditou !

Justin


Kanalreunion.com