Oté

Dévlopman ? Sanm pou moin, sa la pa in gro mo !

Justin / 18 mars 2015

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, mi koné pa kosa na pou tiré dann in kanpagn zéléksyon konmsa, mé sak mi koné sé ké désèrtin i anprofite pou shant zot rangène lo tan pasé, zot rangène dépasé. Pou désèrtin sé lo l’okazion pou rofé lo mond konmsi sa i rofé konmsa ! Nana mèm in pé i anparl dévlop La Rényon konmsi lo zéléksyon sé in référandome pour ou bien kont lo dévlopman. Mi di pa ki, mé suiv mon rogar… Aprésa, étone pa si d’moun i suiv pa z’ot tourné-viré. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, sak ou i di la pa pou étone amoin. Pou kosa ? Pars, konm di lo kont, ou i konfonn lo prinsipal avèk lo moin inportan. Donk si mi di aou lokèl z’afèr lé prinsipal pou nou ? Mon répons, sé zistoman lo dévlopman. Pou kosa ? Pars i pé dir la vi lé shèr, i pé dir na poin travay pou kréol, i pé dir na poin la kaz pou d’moun… é plis ankor é tousa lé vré.

Tout sérir lé také. Mé kosa i pé pèrmète détak bann sérir-la, si la pa lo dévlopman… si la pa la prodiksyon bann rosours siplémantèr. Dizon in pé va pans sa sé lo vyé l’ékol, mé lo vyé lékol, mi pans, na rézon. Kan in sistèm la fine trouv son bout é bin i fo in nouvo sistèm pou déblok bann fors prodiksyon : la pèsh, l’agrikiltir, l’indistri, lo tourism, l’indistri la konésans, bann nouvèl téknolozi, lénèrzi, l’otosifizans dann l’alimantasion é tout sak ni koné.

Lo dévlopman matant sa la pa in gro mo kant mèm la di. Tok ! Pran sa pou ou !


Kanalreunion.com