Oté

Dézakor d’fon, sa i mank pa rant nout parti é sak la kite ali

Justin / 26 févrié 2016

Matant Zélida la ékrir Justin :

Mon shèr nvé, mon spès salté, rouj-de-fon dovan l’étèrnité mi koné pa si ou la foine romark in n’afèr. M’a dira ou épi ou va oir si moin la poin rézon : sa la pa in sogré pou pèrsone, mé ou la romarké, out parti la bien afayi dopi in sèrtin koup de tan é dopi ké li la afayi na plizyèr parti l’apré partaz son rolik… Sa lé vré pou la droit mé sa lé pa vré pou sak i sort koup la kord avèk zot konm lo PLR épi d’ot ankor. Dizon i fé l’èr ké zot la ont an avoir pans konm bann kominis pandan lontan. Mèm ké zot lé ankor plis a droit ké la droit ! Sa lé bien vré pou Iguète é pou anshové ala k’èl i fé piouk-piouk avèk Virapoullé. Konm k’i diré son péshé orizinèl la fine pasé. Donk z’ot z’idé sa lé arienk an sirfas sa alor, la pa di tou an profondèr. Tok ! Pran sa pou toi !

Justin la réponn aèl :

Mon vyé matant mi rapèl aou si ou i ansouvien pi ké kan Iguète la baré, é bin, in zournalis la fé in romark Paul Vergès : la di ali, akoz zot i fash vi ké zot nana lo mèm z’idé d’fon. Paul Vergès la réponn : nana bien in dézakor d’fon rant lo PLR é lo parti kominis-in dézakor de fon. Lo zournalis la koup lo mikro é bann z’oditèr la pa gingn l’okazion antann Paul dsi lo dézakor. Arien, mé in zour kan va komans fé la list bann késtyon bann partan é nou-mèm nou lé pa dakor ébin moin lé sir la lis sar pli gran ké désèrtin i pans. Ni pé di dé-troi z’afèr sinploman : zot i pans dsi la rout litoral PLR é PCR lé dakor ? Pa ditou. Dsi lo vré dévlopman nout l’ékonomi, dsi l’agrikiltir, lo dévlopman la konésans , dsi lo tourism, zot i kroi inn é l’ot lé dakor ? Ké néni. Arzout èk sa bann z’inégalité sosyal épi nout l’idantité rényonèz. Ankor in pti poin : l’intégrasyon ? Pou lo PCR, kolonyalis la sort par la port la rotourn par la fénète é pou bann PLR-sirtou pou la shèf - sé sa k’i fo. Dézakor dsi lo fon na poin, mi koné pa kosa i fo azot. Tok ! Pran sa pou ou.


Kanalreunion.com