Oté

Di a nou madam la miniss !

Justin / 22 zanvié 2015

Zordi la minis dé loutromèr lé an parmi isi la rényon, pétèt lokasyon pou èl ésplik a nou kosa néna pou nou dan son kaba, si néna ? ousinonsa kosa i sar fé domin konm politik pou nout péi. Si boudikont i mèt in kou an plass sak lo prézidan la promèt a nou dopi 2012, si ni pé kont dosi li pou vréman, ousinonsa si li po ral a nou dérièr. Dé zan déza, lé p’tèt lo tan fé inn ti kozé rantronou zis pou war si lo prézidan la pa taz a nou, mi di pa fo fé in bilan lèr la, nonva zis inn ti poz solman zordi mninm, anon profit lo tan èl lé la pou poz inn dé ti késtyon. Pou mon par zordi mwin néna dé késtyon pou èl.

Inn, in késtyon in pé dirèk-dirèk. I konsèrn la « rézionalizasyon d’lanplwa ». Koué i kont fé pou vréman pou bann marmay la poliss ki domann mitasyon la rényon ? Té dové fé in léspèss dérogasyon pou zot konm lédikasyon nasyonal néna, mwa d’out dérnié kan lo prézidan lé v’ni li la donn son akor pou fé in réform pou pa tro pénaliz bann zorizinèr la rényon, mwa d’novanm in dépité osi i déklar li roul pou sa. Bann polisié i atann, aforss, aforss zot lé fatigé atann. Pourvik tousala i tourn pa an lo d’boudin, zot i koné lo rofrin èk banna ?

An dé, dopi lo tan i anparl, ni vé savwar, la osi ni di i s’ré tan pou nou vik sé pa inn ti prozé dé ryin di tou, sé in prozé i sar angaz a nou pou lontan, la nouvèl rout di litoral. Arèt roul a nou kari sou dri souplé. Ni koné tout linkonvénian, i kout pa solman inn ti katsou, ni koné lo danzé la rout si la mèr, san konté problèm ékolozik. Mi rant pa tro dan lo détay, sak ni vé madam la miniss, sé ki di a nou in fwa pou tout kosa i sar fé !


Kanalreunion.com