Oté

Di amoin kissa ou i frékant, m’a dir aou kissa ou i lé !

Justin / 24 févrié 2011

Mon gran-mèr, kan moin lété marmay, té i di amoin konmsa : « Mon anfan, i fo méfyé l’aparans ! ». Moin la pa oubli son parol. Myé, moin la gingn souvan dé foi l’okazion rann amoin kont par moin-mèm, sa sé in vré vérité.
Mi vé pa malparl la rolizion, mé kant mi oi in moun l’apré fé lo kroiyan puisans 23, mi domann amoin, an moin-mèm, kossa moun-la nana pou kashyété. Kan mi antan inn l’apré prèsh la moral, l’apré mète son linz pèrsil-lav-pli-blan, mi domann amoin touzour kossa li l’apré kashyète. Lé vré dan la vi toulézour konm dan la politik, dann z’afèr privé konm dann z’afèr piblik. In gran prédikasyon avèk parol l’amour pou lo pèp, parol solidarité bout-an-bout, fransh vérité, mi èm zot tout ? Oué ! Mé kossa na d’vré, kossa lé mantèr ? Tout médaye na son rovèr, son koté pil èk in koté fas. Lontan, dann fran CFA, noré di in koté flèr épi in koté tète asiréman.
Dann télé, i antan in paké légzanp bann diktatèr la anrishi azot, la anrishi zot famiy, é konm si lété pa asé, la fé pass la mizèr d’moun vèy pa koman. Inn l’avé ramas ziska soisant-dis milyar, l’ote plis trant, l’ote plis ankor, alé oir lo pèp té i tir lo dyab avèk la ké. Mé bann diktatèr l’avé ossi in bann z’ami, zot lété byin antouré, in bann démokrate dé san pour san té i frékant azot vèy pa koman. Moin lé sir, lo tan k’i vien va nyabou débisk in pé. Sa moin lé sir, pars konm di lo kont : « Di amoin kissa ou i frékant, m’a dir aou kissa ou i lé ? ».

Justin


Kanalreunion.com