Oté

Di pi Fèt kaf, di Fèt réyonèz la Libèrté

Justin / 21 novanm 2013

20 Désanm i arvyin, là i fé 2013-1848=165, na plis in sièk é d’mi lésklavaz té aboli isi la Rényon. An plis ke sa, nou sélèb 350 tan lo pèp la Rényon, nou obli pa Sarda-Garriga, Barasoi, Sin-Dni : « Réyonèz, Réyoné, vou zèt lib » !

Anfin, si lo papyé, zésklav té lib, zot i koné bien, an réalité, lo pov boug la poin ryin, la plipar di tan, li artourn sé son propriétèr.

Bon, zot la antandi parlé lo Kod noir, sak i di : lésklav lé mèm pa in persone, li lé moin kin animal, li lé in mèb… bann kamarad Sin-Pol la rofé in lédisyon lo liv. Ti koné, kan ti done sa domoun, zot i koné pa sé koué lo Kod noir !
Rézman, na zinstititèr èk zinstititris va amontr bann marmay in paz zot listwar, listwar zot péi.

In zésklav navé pa d’nom, li té port sak son mèt ! Kan li mor, la poin in plas éspésyal po antèr a li, konm in simtyèr, konbyin d’milyé la zèt dann fon ranpar, i apèl sa mor san sépiltir.

Là, débi désanm i sar arivé, bann MIARO i sar ankor rorganiz Dimitile « Adidamba », sétadir sérémoni po rapèl lo bann zéspri malgas ou dot lorizine, rapèl bann zénérasyon, zordi zot nana bonpé zansèt lé mor isi san rokonésans ofisyèl, a nou fé in manyèr ni oubli pa zot, konm sa zot i protèz a nou osi, fo konèt ou nou sort po konèt ou nou sa va !

Anon partou fé konèt listwar nout péi, nout kartyé, profit lokazyon in komémorasyon po rakont bann domoun zot pasé, po zot konprann laktialité zot péi zordi, é pi ginye prozèt a zot myé si domin.

Di pi Fèt kaf, di Fèt réyonèz la Liberté !

 Justin 


Kanalreunion.com