Oté

Difisil rofé listwar a son lintéré !

Justin / 28 avril 2015

Dopi in bon koup do tan mi antan désértin résponsab parti politik la rényon i répèt, linyon-linyon-linyon. I di konm sa pou zéléksyon rézyonal fo fé linyon la gosh. Déza linyon pou fé koué é èk ki ? Si sé pou roprann lé minm ké la tié linyon an 2010, lèss tonbé nou la finn doné.ki i kri zordi fo fé linyon ? Pou mwin déza i fo ni réponn in késtyon. Sé koué la gosh zordi ? Kisa i roprézant a li ? Eské èt a gosh zordi sé sinploman fé in pé dézord par isi, par laba é alé fé lo do ron a Paris ?

Konm sa dopi yèr néna inn ki roprézan a èl konm lo kandida linyon d’la gosh. Pou mié fé pass la pilil, in boug son parti, dann mikro la pass dovan pou di, sé èl la méyèr, na pwin in ot moun lé kapab, sé èl i dwa alé. Sanm pou mwin i mank in pé réspè pou lo rèss vik déza pou la tèt do lis, i di i diskit pa so sora madam. Déza dimansh matin, avan la rènyon inn la di kont pa si li. Lo swar byinsir madam té invité la télé, vik zot la konpri pou in pé, té lo zévènman di dimansh.

Lo zournalis i domann a li, si li krwa pou vréman sé li lo méyèr vik li vyinn gingn galo zéléksyon kontonal é pli gro galo ankor zéléksyon minisipal ? Lo morso mwin la proféré sé kan lo zournalis la di konm sa « konm ou fé madam lé pa tro korèk vik ou ronié out parti lontan, ou na pwin tro rokonésans pou li vik sé li ké la fé a ou ». Konm lété byin di baya ! Nout tout i koné kisa i lé la kandidat é toulmoun i koné kèl parti la fé a èl sirtou. Lé difisil rofé listwar a son lintéré !


Kanalreunion.com