Oté

Dimansh 6, anon romèt tousala d’si lo ray !

Justin / 3 désanm 2015

An plin konférans d’si la KOP 21, la ba déor, d’si lo réshofman klimatik, dann in gran zournal déor ni pé war in roportaz d’si lo mond, La Rènyon lé anparmi. I mont a nou in pé komansa la réshofman i pé dénatir nout planèt é lo zournal la pran la Rényon konm lil anblématik vik pou zot lo réshofman i pé shanz nout fason d’viv, i pé ménas nout lagrikiltir, i pé mèt nout popilasyon an danzé. Mandoné i pran in pé légzan d’si la Rényon osi.

Konm nou lé in pé lwin, lo zourna i propoz (konm nout parti i di dopi lontan) li propoz ké nou tir parti de tout nout rosours natirèl konmsa ni gingnra nout lindépandans énérzétik. E dié dé si nou néna in takon rosours natirèl. Nou néna la bagass, nou néna lidrolik, nou néna lo solèy parl pi, lo van, la houl, lénérzi volkan toussala. Nou la finn komansé èk bann pano voltaik vik ni alimant déza 12000 kaz é konmsa ni évit déza rozé 8000 tonn CO2.

Nout péi lé an soufrans èk nout 30 pour san d’shomaz é sirtou sak li not osi sé sak mi apèl lo boubou nout péi. Lo transpor. Son tousèl lo transpor i roprézant 70 pour san nout bozwin énérzétik. Pou sa nou navé nout solisyon èk lo tram-train. An 2010 lo santié té préskanbéké la drwat rans la profèr la rout litoral. In lérèr istorik, in linvéstisman déméziré, i favoriz aryink loto, pou lo zournal. Di mansh 6 anon romèt tousala d’si lo ray.


Kanalreunion.com