Oté

Dimansh midi édmi, In l’émisyon rolizyèz déssi Rényon Promyèr !

Justin / 31 mé 2011

Dimansh dèrnyé dési l’kou d’midi édmi, l’avé in l’émisyon rolizyèz bien intérésan. Lété pa solman la mèss bann momon konm banna l’avé di par avans. L’avé sa osi, mé l’avé galman in pti lantrotien avèk Danièl Waro, Paul Hoareau, épi l’évèk La Rényon la gingn l’okazion ésplik in pé son bann z’idé. Té in l’émisyon séryé. La poz tout sort kalité problèm dési nout pèp rényoné ; shakinn la réponn suivan son manyèr pansé. I fo dir, lo moun la kozé i réfléshi dépi lontan dési La Rényon.

Sèl rogré, in l’émisyon télé la pa konm in lartik zournal. Sète-la ou pé lir, arlir, fé travay la tète dési sak lé ékri. In l’émisyon télé sa i pass vite, é kan la fini, ou lé pa tro sir si ou la bien kapt lo z’afèr, si ou la bien konprann lé shoz dann lo détay. In légzanp ? Kan monségnèr l’évèk i parl nout l’intégrasyon dann l’indian-océanité épi son rolasyon avèk nout éstati, mi pans lé intéréssan. Mé kosa i lé sa o-zis ? Kosa na la-dan, kèl sé lo kontour é lo fon dé shoz ? Kan Paul Hoareau i parl sak la vouli sabote nout l’inité é la pa gingné, mi domann amoin kisa i lé, kosa la fé ; pars sa in n’afèr grav sa ! Mèm mon vokabilèr, moin lé pa sir sa i kol avèk manyèr oir lé shoz banna. Solman, ni pé dir, lo sobatkoz i fé arien k’komansé. Lo l’émisyon i mète pa in poin final, mé solman in poin sispansyon.

Sa i fé pans a moin in n’ot afèr galman. Dimansh, lo shèf légliz katolik la done son manyèr oir lé shoz. La done ali la parol, tan myé ! Mé na d’ote osi, an parmi bann rolijyon, nana dé shoz pou dir, é mi pans i fo done azot la parol, zot osi... kan nana in tan ! Pa toute ansanm ! Mé i fo pa oubli azot pars sinonsa in pé lé riskab trouv a rodir, é sa lé pa bon.

Justin


Kanalreunion.com