Oté

Diréksyon otorizé pou bann touris la Shine : Anou d’ète a la otèr ! Sansa arvoir, tak baro !

Justin / 21 zwiyé 2011

Matante Zélida la ékrir Justin :
Mon shèr nové, mon spès salté,
Fransh vérité, m’a dir aou, so kou isi, moin lé pa bien dakor avèk mésyé Didier dési la késtyonn fé vni bann touris la Shine isi La Rényon. D’in sans, moin lé kontan li la vni a-bou an dé tan troi mouvman fé in n’afèr bann rouj de fon la sèy fé dépi san-sètan épi la pa gingné. Zis sa ! Pars pou lo réstan, moin lé pa kontan ké bann moun la Shine i sava ariv isi an karguézon. Mi trouv té pli préférab sé bann Z’éropéin té i vien, ou sinonsa bann Z’ostralien, l’androi mésyé Didier avèk madam Zakline i arète pa d’alé dépi la droite la gingn Konsèy réjyonal. Epi, m’a dir aou, Shinoi-la, mi koné azot bien. Sanm pou moin zot lé pli for pou armas larzan ké pou dépansé. Donk si zot i vien pou tir la tar dsi nou, pou raz anou a-sèk, san savon, mi trouv sa lé pa bon, pars mi oi pa kosa ni sava gingné dann in n’afèr konmsa. Sanm sé zot la mète la droite dann malizé. Toute fason, sé par zot ké bann movèz shoz i ariv ! Tok, pran sa pou toi !

Justin la fé pou répons :

Mon vyé matant k’i koz touzour la boush rouvèr,
Alor vou osi, vi kroi ke la droite La Rényon lé pou kékshoz la-dan. Vi pans ké lo mésyé Didier la parti asiz la-ba Shangaï avèk gouvèrnman la Shine épi la sign in kontra konmsa ? Mon pov vyé matant k’i gingn pa oir klèr dann bouyon noir* la kominikasyon la droite ! Lé vré, zordi, La Rényon sé in DTA (déstinasyon otorizé) pou bann touris la Shine), mé sa la pa fé an in zour. Sa la mète lo tan, pars gouvèrnman la Frans té pa présé oir lé shoz avansé pou nou. An kontrèr, li la amizé vèy pa koman. Epi, bann Shinoi, zot osi, zot i avans a zot vitès. Dizon, pou zot tout, sé in késtyonn long marsh, konm dann tan Mao la fé son révolisyon.
An pliské sa matant, pétète ou i koné pa, mé la Shine sé zordi lo dézyèm péi dési la tèr pou son lékonomi, é si i kontinyé, sar lo promyé. Bann Shinoi, ou la vi, kan l’ariv La Rényon dann tan lontan, la pa konm sak i sava ariv domin. Zot va vni dépansé, vizité, dékouv nout pèp, nout lantant, nout kiltir, artrouv in pé zot diaspora, é sé anou d’fé oir nout bon koté. Pars mi pé dir aou, bann touris shinoi, sa i kontant pa in grimas de sézour, sa lé égzizan dési lo voiyaz, dési lo konfor, la nouritir épi la kalité dé shoz va propoz azot. Si nou lé pa a la otèr, si ni kontant anou dann nout médyokrasi, zot va vni in foi, mé pa dé, zot v’alé dépans zot larzan in n’ot koté. Arvoir ! Tak baro !

* bouyon noir : bann zourite i larg sa pou fé pèrde l’èr bann péshèr. Sa i apèl galman lo sépia.

Justin


Kanalreunion.com