Oté

Dizon bann shovalyé maské !

Justin / 14 mars 2011

Mé ousa i lé l’UMP don ? Ousa i lé parti lo pti Prézidan ? Lé pa possib ! I diré na poin pèrsone i roprézant parti-la dann zéléksyon Konsèy zénéral La Rényon ! Poitan, i mank pa d’moun nana l’anvi an avoir le pouvoir, kansréti arienk in pti pé. Konm di la shanson : « kan mèm pa bokou, in pti morso ! ». I mank pa bann zènn, sansa bann vyé lou, gran-dan é tou, léspri in pé pti fransh vérité, san l’anbisyon pou zot péi. L’anbisyon pou zot pèrsone i sifi !
Ousa i lé so bann shovalyé ? Sak la bate la min kan la déside pi fé tram-train, sak la aplodi dé min kan la di i fé pi la MCUR épi la fouy pou l’énèrzi volkan épi, boudikont, l’otonomi énèrzétik. Ousa i lé bann siportèr lo dé mil bis i oi pa la koulèr, sansa sète la rout litoral sis voi ké ni voi pa, lo kat mil travayèr dann tourism, lo silikone-valé La Rényon ? Ousa i lé bann z’invité la boustifaye la Réjyon. La pèrd ? La fané ? La shap dann kane ? I pé pa disparète konm sa, kor-zé-bien, kan mèm la di !
Ousa i lé bann moun té la aplodi kan gouvèrnman la di va tir la tare déssi La Rényon ossi pou soi-dizan sov bann finans la France ? Ousa i lé sak la pans konm gouvèrnman té i fo artard laz la rotrète, sak té dakor pou déranbours médikaman, sak la bien konpri lo pov gouvèrnman té i pé pa goumante konm k’i fo larzan pou bann andikapé, pou bann vièy pèrsone, pou bann sédik an finn droi ? Ousa i lé bann siportèr lo pti Prézidan, sansa méssyé Didyé, lo bèl ome ;
Mon kamarad Zanbass la di a moin : inkyète pa, zot lé la ! I sifi pou bébisk azot. Sak lé dann bokal lé parèy mèm, mé létikète la shanjé, konmsa demoun La Rényon lé riskab pa rann azot kont bann sabotèr lékonomi lé la, bann déstriktèr la sosyété lé la. Zot lé la. Mé zot i avans maské. Dizon bann shovalyé maské !

 Justin 


Kanalreunion.com