Oté

Dizon piton dé nèz la fé inn ti souri

Justin / 18 séptanm 2014

So dérnié tan, bann dépité té i tyin lo o di pavé kom i di, té i antrotyin lo sispènn é sirtou zot té i tienbo pi an plass. Dopi in koupdotan é dopi bann minis la démisioné, zot i an souvyin, té i falé ranplass a zot. Pou fé kourt, té falé nonm d’ot é apré lo promié minis i fé son déklarasyon politik é apré sa ankor i domann la konfian lo bann dépité. Pou war kisa lé dakor, kisa lé kont, si i vé kontinié kom sa, ou si i vé kass tournan. Dikou, koué nou la pa antann : zot va war sak zot va war-Kal a mwin sinon mi kass bouton mon kabay-Rotyin a mwin sinon mi shavir tout, lo total èk lo kapital. Mon dié ségnèr, vodrémié antann sa k’èt sour. Si nou kont si so bann la, pou sov a nou ni bwar bouyon. An plis, bann dépité sosialis èk zot kouran, zot nana bonpé kouran zot, lé a drwat de la gosh, a gosh de la drwat, zot lé o milié, par koté, partou é sirtou nilpar. Amwin mi di, aforsse awar kouran in zour va fé kouran d’èr pétèt. E an plis ankor, i parl a nou bann frondèr, mi esplik pa zot sé koué lo bann frondèr, kan ti ékri lo non fé tansyon oubli pa lo N sinon la pi parèy, i shanj toute, mé pétèt lé bon osi kom sa. Po kosa mi di sa ? Parsk, zot i èm ral kart dosou.

Tanka bann dépité la rényon, parl pi. Zot tout alé pouss kok dann la monté bélèr. Zot lé kom doktèr lo sikré, napwin in i lèv lo p’ti dwa po nou, komsi la rényon la pwin difikilté, la pwin shomaz, la pwin la misèr, komsi tout i roul ron, tout lé dos. Nou na sèt dépité é in pé i di « kan tout lé la lé bon, mé kan lé pa la i mank pa personn ». Ala in bon koseman, lé vré vréman. Tout ansanm i kass pa la pat in kanar oté. Zot i koné sé ki doktér lo sikré, sé in doktèr a shak malad, shak maladi i donn lo mèm trètman, i donn lo sikré pou bwar, pou géri. Bin lé kom nout bann dépité la rényon. Pou geri la rényon i donn lo sikré. Kont pa si zot pou klérsi nout domin, pou donn in l’idé, zot l’idé sé l’idé déor, zot na pwin ryin po nou. Sak i fé déor laba, zot i rod pou fé isi, mèm si soulié lé tro gran po nou, mèm si linèt lé pa adapté ousi paleto lé déshiré ou in pé séré. pran sa po ou, mèt ali, é diskit pi. I pé pi kontinié kom sa, nout zonbri la finn koupé, nou pa bézwin i tienbo nout min po koup shomin, nou koné sak lé bon pou nou.

A zot mi koné pa mé a mwin mi di té i falé vot in kou kont, pou défann la rényon nésrès. Si in boug i èm son péi, i pé pa vot tousala z’afèr i sar tonm si nout tèt. Nana z’afèr oui. Si ni ékout lo médèf ni tonm kardiak l’èr kilé. Mi di lo médèf parsk sanm po mwin sé zot ki mèn lo bal an so moman, zot i mèt la mizik, tango aou, boléro aou, kalipso aou, éslo aou é banna i di nana in ti pé vals osi. Sé pousa dopi mardi mi di : Piton dé nèz la fé inn ti souri.


Kanalreunion.com