Oté

Do pin tranpé dan luil, pourkoi pa ?

Témoignages.re / 20 févrié 2014

Zot i koné la sanson po marmay : « tranpé dan luil, tranpé dan lo, sa fera in eskargo tou so, niméro zéro, la kiyèr dan l po, kapitèn banjo ! »
So matin mi lèv, an so moman mi viv konm in ermit, moin na soso, moin na lo sèl, moin na in zonion, in gous lay, moin na minm lo gaz ék gazinièr, gran lix, zalimèt plis briké oka ou zalimèt i pran pa ék limidité !

Koué i mank a moin po fé kui in bon soso mayi ?
Oté, lo marmit !mi sarpa fé kui manzé dann kastrol kafé ?
A moin ke la touzour aprann mé zanfan abitié manz sak nana sirtou lo matin ; si ou na patat ,manz patat ; maniok, bouf lo maniok !sonz,-tahiti,i di taro ; guyane i di dachine- aprési lo sonz ; défoi i pé èt osi lo kanbar(fransé, i apèl sa igname), mounoir sa lé bon ; mi obli pa banane ver, mir ; manz ék do sél, poiv, ou sinon ék do sik, minm do mièl si ou nana ; ou kalkil sak i pous la Rényon sé lo derniè, pa di tou, o kontrèr ; na moins lavion, bato po pèy kérozèn, fioul, dérivé pétrol ; arèt polié nout planèt ék gaz a éfé d sèr.

So matin, po arnir mon pti dézéné… o débi mi kontant in ti kafé.
Mé kabri la fin ; in paké zérb liane ék fosi i fo koupé ; out park lé séparé an 4, i fo 4 paké ; si ou ar kas dé troi boi sék po dégaz in pé la foré , talèr i fodra plant inn ti pié mayi. di pa moin out léstoma i krèz pa ; di pa moin li kri pa famine ; koué manzé ?
Na la in bokal luil rékipéré si kuison sé pa koué ! Ou na in gran morso dpin : sa lé sèk ! ék koué ti sar mouyé ?Luil sa i kontiin sertin lipid vézétal ;sa la pa lo dernié ; arzout in gorzé dlo, va dsann !
Do pin tranpé dan luil, pourkoi pa ?

 Justin 


Kanalreunion.com