Oté

Doboute épi guète in minorité apré gonf son pla !

Justin / 15 novanm 2011

Matant Zélida la ékrir Justin :
Mon shèr nové, mon spès salté,
Mi konpran pa bann rouj-de-fon, kan zot i krétik la ministrèz l’Outre-mèr, épi lo gouvèrnman la Frans. Pou zot, i fo pa toush bidjé l’Outre-mer, mèm si gouvèrnman la Frans lé dann difikilté. Si ni kalkil bien : i fo diminyé bann dépans piblik pou fé bès la dèt lo péi, pars la dèt lo péi sé konm ki diré in kansèr l’apré manj son l’ékonomi par anndan. Pou kèl rézon i toush arpa l’Outre-mer ? La prèv, sa i doizèt konmsa, madame Penchard, in fanm l’Outre-mer, mésyé Didier, in boug l’Outre-mer galman, lé dakor pou ké l’Outre-mer i aport son kontribisyon. Boudikont, zot fyèrté, sé pèrmète lo péi pou diminyé son dèt épi rant firamézir dan lo pakt éstabilité l’Erop, k’i di konmsa lo défisit bidzétèr i doi pa dépas troi pour san pou l’ané. Ala in fason pou k’l’Outre-mèr i dovien in bon z’élèv la Frans, in bon zélèv l’Erop. Sé zot fyèrté épi zot patriyotis. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi koné pa si ou i rann aou bien kont ou l’apré di in bétiz pli gro ké out koko. Sof out réspé, mé nou, bann péi l’Outre-mèr, nou lé pa privilézyé, par rapor bann moun i abit la métropol. Zordi ankor, nou la pankor trap nout dévlopman l’ékonomi. Na plis la moityé d’moun désou lo sèy povrété. Na plis sinkant pour san bann jènn i soufèr lo shomaj. Nana plis san sinkant mil shomèr dann katégori inn é katégori dé. Trann-sète pour san dmoun an az é an fors pou travay i travay pa. Donk, mi oi pa pou kosa ni doizèt solidèr in gouvèrnman la fout anou dann inn ponp konmsa. Alor la trouv l’arzan pou bann rish pèy z’inpo an moin. La trouv l’arzan pou soutien bann bank mèm si zot la fé in zéstyon an batonn shèz. Zordi i anparl rokapitaliz banna. Pandann tan-la, bann ti-kolon, bann ti travayèr, bann moiyin, bann vyé pèrson, kosa zot i fé ? Zot i doizèt fyèr an avoir zot l’éstoma dann talon, dor dann kok loto... dobout, épi guète in minorité apré gonf son pla.

Justin


Kanalreunion.com