Oté

DOM-TOM : resanblans, diférans…

Justin / 30 novanm 2013

Mi vyin rogard Victorin Lurel an vizit Polinézi Fransèz… isi 8h38 (vendredi), la-ba jeudi soir 18h 38 (Tahiti), mé 19h08 o Markiz. Su lo mèm téritoir, èk la distans, zot i done inn ti dékalaz orèr… Ou na 1.300 Km, 3 zour an bato, 4 èr an avyon ant Tahiti é Markiz !

La Polinézi lé in TOM (Teritoire Outre-mer), ankor in nom i konvyin po lo kolonizatèr fransé, po in Tahisien (ou in Markizien), li lé dan la mèr, loséan Pasifik, sé la Frans lé loin lot koté la planèt, sé la Frans lé zoutre-mèr…

A nou la Rényon, a koz apèl a nou DOM (Département Outre-mer) ? a nou Kréol la Rényon, nou lé shé nou, bann Fransé la-ba lé outre-mèr, bon pason ladsi.

O moin la Polinézi lé otonome, lo bann zakor i pas èk l’Eta an partnèr, i sign kontra égal-égal i di ant lo péi (Polinézi) é l’Eta (Frans), donk Lurel i fé moin son vayan, son kozman lé pa ditou konm la Rényon, li arèt zoué son patèrnalism, son donèr d’léson, konm li la ni fé la Rényon.

La Polinézi na in ti sèr dan lo Pasifik, sé la Nouvèl Kalédoni (dizon lo Péi kanak ou Kanaki) : ankor in péi la été kolonizé, èk Bagnes konm an Guyane… tout domoun indézirab, kondané an Frans, i anvoy dann joloni, Nouméa, Sin-Loran-du-Maroni.

Mé zordi, bann Kanak i trèt égal-égal èk péi lo mond antyé, i vann zot kuiv lo pri zot i vé, i domann pa la Frans son avi…

A nou la Rényon, nou la bézoin in pé plis lindépandans (lo mo i fé pèr !?), konm sa nou osi nou giny pran désizyon lé bon po nou, antro nou, arèt toultan domann la Frans !

DOM-TOM i rosanm, mé na in gran diférans !!

Justin


Kanalreunion.com