Oté

Domin i raz gratuite ! Sansa i raz a sèk ?

Justin / 23 zwin 2011

A ! Méssyé Sarkozy, san rakont la mantri, ou sé in onm kapab ou ! Fransh vérité ! Ou i arkil pa dovan arien. Késtyonn promès-la, sa ou i yinbou fé. Pèrsone i bate pa ou pou sa.
Travay plis pou gingn plis ! Shomaz la goumanté é travay l’avé moins. Moin sar lo prézidan lo pouvoir d’asha ? Pouvoir d’asha la kil aryèr. Ou va konsèrv pouvoir d’asha bann rotrète ? La raz la pint bann rotrète ; Ou sava rédui la mizèr ? La mizèr lé la, é pli an form k’avan, nana mèm la mizèr noir. Kont pa dsi ou pou mète nouvo z’inpo, nouvo taks ! Késtyonn nouvo z’inpo, nouvo taks, ou la karéman bate lo rokor. Ou i sava pa andète ankor plis la France ! La France lé plis andété ké zamé, plis katrovin pour san son PIB. Etsétéra, étsétéra, la ké lo ra. Na poin in prézidan la roul bann péi l’Outre-mèr konm ou la roul anou. Olèrk protèz anou kont la kriz, ou avèk out parti la foute anou an plinn dan. Sis novanm 2009 ! Zour-la ou la tap in gran kou. An parol, ou la done anou satisfaksyon. Dan la réalité, té pa la mèm shoz ditou. Out minis la mèm nyabou défiguir lékonomi andojène pou fé avèk sa in linstriman pou bann kapitalis la France fé la konkète bann marshé dann péi émèrjan.

Anfin, koman-koman out manda i anshèv. Partou bann Fransé l’apré kriyé pars i diminyé lanploi dann la fonksyon piblik. Bann paran lé an kolèr pars i vé fèrm in bon pé klass lékol. Ala kossa ou i trouv a réponn azot : pou la rantré 2012 i fèrm ar pi bann klass, mé sak lé désidé pou 2011, i arvien pi dsi. La rantré 2012, out manda sar fini ! Kissa i done aou l’otorizasyon déside pou la rantré 2012 ? La pa pars zournalis i lav out pyé é i dig-dig out koko ké ou i doi prann anou pou in bann tète vide. Méssyé Sarkozy, ou i fé pans amoin bann ti déssin l’avé dann salon koifir, dann tan lontan. Kossa té i di dossou lo déssin ? Té i di, domin i raz gratuite. Pli pir ké sa, moin na l’inpréssyon, ou i vé raz anou a-sèk, so kou issi, raz anou san savon.

Justin 


Kanalreunion.com