Oté

Done bann travayèr l’ékol in bon stati kant mèm la di !

Justin / 14 août 2012

L’èr mi ékri mon dé mo, i koné pa ankor si la rantré dan l’ékol primèr épi dan l’ékol matèrnèl va tonm lo sèz moi d’out sansa si va armèt ali pou in pé pli tar. Bann mèr i kontinyé dir zot na poin lo moiyin k’i fo pou in rantré dan la sékirité épi l’ijyène. Ni vé, ni vé pa, mé zot lé dan zot rol, é rol-la sa lé séryé sa !

Dopi in bon koup de tan, nou lé dann in sistèm konmsa : i baz dsi bann kontra édé pou fé marsh l’ékol. Dsi kontra édé péyé bon marshé. Banna lé prékèr, zot i koné pa kosa va fé avèk zot domin. Zot lé krétiké, vèy pa baba ! I ariv amoin souvan antann désèrtin apré kas dé sik dsi zot do. Mèm dan l’opinyon, in pé i pans, bann ti-kontra sa in bann moun initil, mèm si i rèv an misouk, dé foi i rovandik lo droi pran zot plas... Poitan, si mi tronp pa, bann ti-kontra i zoué in rol inportan dan l’ékol vi k’zot i fé bann vré métyé, épi zot lé nésésèr pou lo sèrvis l’édikasyon bien marshé. La loi la mèm prévi fé done azot la formasyon k’i fo. Malorozman, i zap dsi la formasyon !

Prézidan la Répiblik la di, lo shanjman i komans avèk li. Bin nou lé présé oir shanjman-la, tèl fason k’lédikastyon nasyonal i arvien in sèrvis kalité. Nout z’anfan i mérit bien in shanjman konmsa, é nou, paran, ni éstime sa lé inportan galman. Done bann travayèr l’ékol in bon stati kant mèm la di !

Justin


Kanalreunion.com