Oté

Donkalor poukoué la COP21 ?

Justin / 31 octob 2015

Dann in mwa zour pou zour, lo 30 novanm, 195 shéf léta i réini a zot pou in konférans si lèshofman klimatik, i réini a zot laba Pari pou in vintéinièm fwa, sépousa i apèl sa la COP 21, la vintéinièm konférans si léshofman klimatik. Boudikont sé pou tyinbo léshofman la planèt an d’sou 2 dégré par rapor nout tanpératir mwayinn ziska 2100, si i désot 2 dogré i dovyin danzéré pou nou. Lo nivo la mèr i pé monté, ni pé èt inondé, èk la sésrèss, kou d’van tousala.

Alerkilé, na pwin aryin i pé fé préwar a nou in siksé mwa désanm. Néna i di minm o lièrk awar in siksé pou 2 dogré, somanké i pé alé ziska 4, 4,5 dogré par d’si la mwayinn si i kontinié. Ni koné lo rol la polisyon dann léshofman, lo rol lo gaz léshapman loto, an plis kan lo loto i roul èk gazwal néna plis la fimé, rapèl a zot lo léskandal loto diézèl la ba déor ? Lo lozisièl kashièt anndan pou fé bès lo to polisyon si lékran, inn ti nestan, zis lo tan pou méziré.

La ni aparann zordi, o lièrk sanksyionn lo bann frodèr loto, an soumarin linion éropéinn la donn lo fé vèr pou bèss la norm antipolisyon. O lièk fé bèss la polisyon li minm dirèk, la désid fé bèss la norm. Boudikont i donn in passpor bann konstriktèr loto kont la santé domoun. Par rapor lo 2 dogré la COP 21 na in dépité éropéin la di konm sa “Odrémié èt pragmatik, Pa bozwin donn in lobzéktif ké la pwin pérsonn i krwa“. Donkalor poukoué la COP21 ?


Kanalreunion.com