Oté

Donn a mwin out mont, ma donn a ou lèr !

Justin / 19 févrié 2015

Touzour i di moun lé rapiang, i manz an prèt, i touf dodan, i partaz pa, zordi mi pé di néna osi moun zénéré, i kont pa i donn. Lo kèr banna lé larz, télman lé larz lé konb fèy lo tin. In limoris la di « donn a mwin out mont, ma donn a ou lèr ». Sa i konvyin byin banna. Zot la konpri kisa i lé ? Bann sosialis baya. Banna la désid partazé. Zot va di, lé tan, dopi lo tan ni atann. Solon zot kosa banna i vé partazé ? La mizèr ? lo mago ? Larzan ? Travay ? Anon zoué in pé « lé fré, lé sho » pou byin konprann. Banna i vé goumant lo smig ? in-in ou lé glasé ou la.

Banna la désid donn in moné bann vié ? la ou lé fré bayoun.I sar partaz travay antronou ? Ou lé ankor lwin, touzour. A… mwin la trouvé, zéléksyon i ariv banna i pèy biyè an poundiak pou sak i vé, pou bat karé déor ? Ou komans tiédir, mé ou lé ankor lwin, ou tronp, la pa bann sosialis sa, sa la rézyon i distrié biyè tankipé, néna pou doné ziska tan zéléksyon sanm pou mwin. Mi rovyin si partaz bann sosialis. Pétèt banna i vé galiz in pé rant sak lé rish èk sak na pwin boudikont pou vni ansoutyin bann pov ?

Pétèt mi di, aprétou zot lé sosialis, zot i dovré èt la pou èd bann pov kansréti in fwa dan zot vi. Nonva, ousasa ou la rofrwadi ankor plis. Ni kontinié pou war. A mwin la trouvé, bin voui banna i vé partaz zour féryè bann katolik ? La lé sho brilan la ou la trouvé pou vréman. Konklisyon d’tousa, oboudikon, konm lé pli fasil partaz sak la pa pou, i tir si inn, pou pa donn lot, ala zot zénérozité èk maléré. Konm lo limoris la bon o i di, é mi pans li na rézon. Konmsa minm banna i azi lo pé, i pran nout mont pou donn a nou lèr.


Kanalreunion.com