Oté

Donn pa zot lo bon dié san konfésyion !

Justin / 25 zwin 2015

Poukoué ni dovré kontinié mèt nout konfians touzour dan la min banna ? Mi sort argard zaktialité dann télé, plito sat déor vik lété si in shèn déor. Ala i anparl bann zopératèr téléfonn. In patron gro zozo minm dann téléfonn i vé ashté in ot patron li osi gro zozo touzour dann téléfonn, néna ryin déspésyal, tou lé zour dan so mond la néna sa, inn i ashté, lot i rovann tousala. Mé la pou lo kou konm néna gro larzan si la tab, diss miliar solman pou inn. Kan mwin la vi sa, la fé romont a mwin lwyin dan lo tan.

An 1997 gouvérnman sosialis an plas, voui gouvérnman Jospin i di a nou konmsa, dan nout lintérét, dann lintérét la frans, dann lintérét bann zanplwayè zis pou nou, ryink pou nou, odrémié privatiz lo lopérateur istorik konm i di. La ésplik a nou konm sa, vik nora plis lopératèr an plas, lo pri va d’sann, banna va manz a zot antrozot, tousala sora bon pou nou. Kosa ni wa zordi ? Banna lé konm laron an fwar, zot i antann ansanm pou mèt lo pri é si i kontinié konm sa ni sar rotrouv a nou zordi èk in sèl lopératèr é ankor a li minm i sar fé la pli èk lo bo tan.

An 1997 déza banna la ramas mantèr èk nou, laranzman té fé pou partaz in morso gato, boudikont la privatiz pou donn bann moun privé in nafèr té i apartyin nout tout. Gouvérnman sosyalis la fé sa. Mi parl pa zot lo déga la fé dan lo lantropriz. Dopi 1997 i kont pi lo nonm suisid dan lo lantropriz. I prétan té in métod pou kas in pé la sékirité d’lanpwa. Déza an 1997, san konèt bann sosialis té i fé déza di Macron “té i fout déor pou mié ropran“. Sépousa mi donn pa zot lo bon dié san konfésyon !


Kanalreunion.com