Oté

Dopi 2007, bann Rényoné l’avé rézon é mil foi rézon !

Justin / 2 mé 2012

Vantyèr-o-soir, moin la antann dann in radio in sobatkoz rant zournalis. Banna té apré parl dsi la politik, sirtou dsi z’éléksyon prézidan la Répiblik. L’èrk l’ariv, lo finisyon banna la poz dé késtyon : kosa va spasé La Rényon si Sarkozy i ranport lo z’éléksyon épi kosa v’arivé si sé Hollande k’i gagn ? Avan sa, banna l’avé fé la romark bann Rényoné i vé toutfors in shanjman. Biensir, kan promyé tour in z’éléksyon, in kandida i ranport plis la moityé bann votaz, kan sé lo konkiran dirèk lo prézidan k’i ramas tousa la voi-la, la pa bézoin, konm di lo kont, sort l’ékol Politéknik pou konprann in n’afèr konmsa.

Donk, si bann Rényoné i domann in gran shanjman épi si i arsèrv azot lo mèm manzé gaté, lé sir, banna sar désu, sar mèm malkontan, pétèt an kolèr. Pars si ou i oi sak i éspas dépi l’ané 2007, épi dopi l’ané 2010, lé fasil konprann na poin l’éspoir pou nou. Tout mové z’afèr nou la konèt lé riskab nou va konèt ankor an pli pir, an pli grav. Solman, nou lé kant mèm a domandé si bann Rényoné va siport ankor sink z’ané vash mèg an plis. Sirtou ké nou la fine konstaté, nana in fason tir anou dann malizé : nou lé pa kondané in maléré sor konmsa, é nout maléré sor lé solman bazé dsi in mové politik.

Si sé Hollande k’i gagn lo z’éléksyon, banna la di, i fo li fé in n’afèr sèryé pars bann Rényoné i atann si tèlman... i kont si tèlman dsi lo shanjman ké li na dan l’obligasyon réisi son manda pars demoun va arvir kont li konm la arvir kont Sarkozy. Arvir kont Sarkozy ? Non va, dopi 2007, la mazorité Rényoné i ankès pa boug-la. Dopi 2007, bann Rényoné lété fine konprann dan kèl tablatir bononm-la té i sar mèt azot. Mi pans zot l’avé rézon avan bann Fransé d’Frans, é mil foi rézon.

Justin


Kanalreunion.com